Մոսկվան մտավախություն ունի, որ Հայաստանի եվրաինտեգրումը կարող է հանգեցնել Ռուսաստանի համար Հայաստանի օդային տարածքի փակմանը,- ասել է փոխվարչապետ Օվերչուկը։
«Վաղը Բրյուսելում ձեզ ասելու են՝ փակեք երկինքը ռուսական ինքնաթիռների համար, դուք ի՞նչ եք անելու։ Փակելու եք, որովհետև այլ տարբերակ չեք ունենալու։ Վաղը ձեր վարորդները գալու են հասնեն Վերին Լարս, որից հետո բեռները կցվելու են ռուսական կամ բելառուսական բեռնատարներին, հայ վարորդը հետ է գնալու։ Մենք հարգանքով ենք վերաբերվում հայկական կողմի դիրքորոշմանը, բայց մեր շուկան մենք պաշտպանելու ենք։ Դրա համար էլ այսօր Հայաստանի հետ առևտրաշրջանառությունն ընկնում է»,-կանխատռեսումներ է արել ռուս պաշտոնյան։
Ռուսաստանի և Հայաստանի միջև առևտուրը մինչև 2025 թվականի վերջը կարող է նվազել 3 միլիարդ դոլարով, Սանկտ Պետերբուրգի տնտեսական ֆորումում հայտարարել է նա։
Հիմնական պատճառների թվում նա նշել է որոշ խոչընդոտներ և կարգավորող մարմինների աշխատանքը։ Կան նաև խնդիրներ՝ փոխադարձ հաշվարկների հետ կապված։ Անհրաժեշտ է նաև ընդլայնել Վերին Լարսի անցակետերի քանակը, որտեղ այս օրերին կրկին գրանցվում են մեծ խցանումներ։
2024 թվականին Հայաստանի և Ռուսաստանի միջև առևտուրն աճել է գրեթե 1.6 անգամ և կազմել ռեկորդային 12 միլիարդ դոլար։
