Խաղաղ պայմաններում բանակում մահվան որևէ դեպք մինչ այժմ լիարժեք չի բացահատվել. այդ մասին գոնե հրապարակային չի հայտարարվել, որպեսզի հանրությունը տեղեկանա իրական մեղավորների մասին, Azg.am-ի թղթակցի հետ զրույցում ասաց «Ընդդեմ իրավական կամայականության» ՀԿ գործադիր տնօրեն, իրավապաշտպան Լարիսա Ալավերդյանը՝ անդրադառնալով վերջին մեկ շաբաթվա ընթացքում բանակում արդեն երկրորդ մահվան դեպքին։
«Կարծում եմ՝ Զինված ուժերի սպայական անձնակազմն այսօր մասնագիտական առումով նահանջել է այն մակարդակից, որում եղել է մինչև 2020 թվականի ամառը Այդ ժամանակ երկրի վարչապետի աթոռը զբաղեցնող անձը բանակին ներբողներ էր ձոնում, և մենք գիտեինք, որ մինչև 2018 թվականը իրականացվում էր շատ կարևոր գործունեություն՝ հնարավորինս նվազեցնելու խաղաղ պայմաններում զինծառայողների մահվան դեպքերը։
Համոզված եմ՝ այժմ հայկական բանակում չկա պատշաճ մակարդակ՝ ո՛չ պրոֆեսիոնալ, ո՛չ պրակտիկ առումներով։ Կարծում եմ՝ սպայական անձակազմի և բարձրագույն հրամանատարության շարքերումչկա այն, ինչ կոչում են կարգուկանոն, դիսցիպլինա։
Բանակում խաղաղ պայմաններում մահվան դեպքերն ընդամենը սառցալեռան գագաթն են։ Մենք միշտ ընդգծում ենք, որ եթե նման դեպքեր կան, նշանակում է՝պետք է ուսումանսիրել սառցալեռան ստորոտը, և անպայման կգտնվեն բազմաթիվ խախտումներ»,- ասաց Լարիսա Ալավերդյանը։
Իրավապաշտտպանը հիշեցրեց՝ մինչև 2018 թվականը գործում էր Պաշտպանության նախարարությանն առընթեր երկու խորհուրդ, որոնցից առաջինն ուսումանսիրում և մոնիթորինգի էր իրականացում բանակում՝ սնունդ, հագուստ, առողջական վիճակ, կարգուկանոն և այլն։
«Այժմ բանակում տեղ գտած թողտվությանը կարծես նշանակություն չեն տալիս, որովհետև կա ավելի ընդհանուր մի նպատակ՝ հասարակությանը վախեցնել պատերազմով, ծնողներին՝ զավակներին բանակ ուղարկելով։
Երկու բան է կատարվում՝ մեկը, որ կարող են գումարի դիմաց չծառայել, ինչը մեր նման երկրների համար ուղղակի խայտառակություն է։ Երկրորդը՝ բանակում ոչ միայն արատավոր երևույթներ են տեղի ունենում, այլև այս տարիների ընթացքում իրար հետևից տեղի ունեցած ողբերգական դեպքերը մինչև վերջ չեն բացահայտվում։ Այդ մասով մենք ավարտուն դատական գործեր չունենք, այդ թվում՝ Ազատ գյուղի զինվորական կացարանում բռնկված հրդեհի հետևանքով մահացած 15 զինծառայողների դեպքը»,- ասաց Լարիսա Ալավերդյանը Հայաստանից արտագաղթի մեծ ալիքը պայմանավորելով նաև բանակում տիրող մթնոլորտով, որը շատ ծնոնղների ստիպում է լքել Հայաստանը՝ միայն թե իրենց զավակները ժամկետային զինծառայության չանցնեն։
Հիշեցնենք, որ հոկտեմբեր ամսվա ընթացքում արդեն երկրորդ դեպքն է գրանցվում, որ ոչ մարտական պայմաններում բանակում զինվոր է մահանում։ Մասնավորապես , երեկ՝ հոկտեմբերի 13-ին՝ ժամը 09:30-ի սահմաններում, հայտնաբերվել է ՊՆ N զորամասի զինծառայող Աղասի Սերոժի Դալլաքյանի դին՝ հրազենային վնասվածքով։
Հոկտեմբերի 6–ին` ժամը 10:00-ի սահմաններում էլ, հայտնաբերվել էր ՊՆ N զորամասի զինծառայող Վահե Բագրատի Հարությունյանի դին՝ հրազենային վնասվածքով։ Քրեական վարույթ է նախաձեռնվել ինքնասպանության հասցնելու հատկանիշներով։
