«Քանդված տներ, թշնամուց մի քանի հարյուր մետր հեռավորության վրա ապրող մարդիկ, վախ, որ թշնամին
կարող է ամեն րոպե նոր ագրեսիա իրականացնել: Սյունիքում այս ամենը տեսել ենք ու արձանագրել:
Ադրբեջանն օկուպացրել է Հայաստանի Հանրապետության՝ միջազգայնորեն ճանաչված սուվերեն
տարածքները, ներս է մտել այդ տարածքից: Ադրբեջանի նկատմամբ կկիրառվե՞ն պատժամիջոցներ. դժվար
է ասել: Դրա համար պետք է Եվրամիության 27 երկիր այդ որոշումը կայացնի, բայց արդյո՞ք բոլորը նման
որոշում կընդունեն»,- հայաստանյան լրատվամիջոցների հետ հանդիպման ժամանակ ասաց Եվրոպայի խորհրդարանի պատգամավոր Ֆաբիո Մասիմո Կաստալդոն։
ՀՅԴ Հայ դատի Եվրոպայի գրասենյակի ջանքերով հոկտեմբերի 31-ից նոյեմբերի 4-ը Եվրոպական խորհրդարանի պատգամավորները փաստահավաք առաքելություն են իրականացնում Հայաստանում։ Նրանք երեկ եղել են Սյունիքում, սեփական աչքերով տեսել ադրբեջանական հրետակոծությունից քանդված տները, խոսել սյունեցիների հետ, որոնք մի քանի հարյուր մետր հեռավորությամբ են ապրում զինված թշնամուց։
«Անհերքելի է, որ Եվրոպան էներգետիկ անվտանգության խնդիր ունի, հետևաբար՝ կախվածություն
ադրբեջանական նավթից: Իմ երկիրը՝ Իտալիան, 40 տոկոսով կախված է ռուսական գազից, Գերմանիան՝
60 տոկոսով: Այսօր Եվրոպայում էներգետիկ անվտանգության խնդիրը խիստ մտահոգիչ է: Բայց այս
հանգամանքը չպետք է ստվեր գցի մարդու իրավունքների պաշտպանության ու մեր դիվանագիտական
ջանքերի վրա»,- ասաց իտալացի պատգամավորը։
Ինչ վերաբերում է Արցախի կարգավիճակին, ապա նա համոզված է, որ այդ հարցի վերաբերյալ
արցախցիները պետք է իրենց դիրքորոշումը հայտնեն, ու պետք է պաշտպանվի, կարևորվի նրանց ազատ
կամարտահայտման, ազատ ապրելու իրավունքը:
«Մենք չպետք է զոհենք այդ մարդկանց ինչ-որ դիվանագիտական խաղերի համար: Ադրբեջանը չի կարող արցախցիների իրավունքները պաշտպանել, դրա վառ ապացույցները մենք տեսել ենք ու այսօր էլ տեսնում ենք, օրինակը՝ Սյունիք»,- նշեց Ֆաբիո Մասիմո Կաստալդոն։
Նա համոզված է՝ Ադրբեջանն այն երկիրը չէ, որը կպաշտպանի արցախցիների իրավունքները։ Սեպտեմբերյան ագրեսիայից 50 օր է անցել, բայց Ադրբեջանը թույլ չի տալիս մեզ ռազմական գործողությունների վայրից հանել հայ զինվորների մարմինները, փակել է հայ ռազմագերիներին վերադարձնելու հարցը։
«Այո, Ադրբեջանը, թույլ չտալով ռազմական գործողությունների վայրից հանել հայ զինվորների
մարմինները, խախտում է միջազգային նորմերը: Սա անընդունելի է, որովհետև հենց Եվրամիությունն է
այդ նորմերը սահմանել: Այս հարցը պետք է բարձր ատյաններում ներկայացվի՝ որպես կարևոր օրակարգ:
Մի բան պարզ է՝ արդար բանակցություն լինել չի կարող, եթե ձեռքիդ մեջ զենք կա»,-եզրակացրեց եվրոպացի պատգամավորը:
Նա հորդորում է՝ մի ասեք հայ-ադրբեջանական սահման, ասեք՝ շփման գիծ։ Ադրբեջանցիները 130 քկմ ներս են մտել ՀՀ սուվերեն տարածք։ Միջազգայնորեն ճանաչված սահմաններով Հայաստանի սուվերեն տարածքից ներս մտած ադրբեջանցիների հետ հայերը շփման գիծ ունեն, բայց ոչ երբեք՝ հայ-ադրբեջանական սահման։ Եթե Ադրբեջանը համաձայներ եվրոպական դիտորդական առաքելություն բերել, ապա այդ պատգամավորները գտնվելու էին և աշխատելու էին դարձյալ ՀՀ սուվերեն տարածքում՝ պարզապես շփման գծից այն կողմ։
Այս այցին եվրոպացի պատգամավորներն Արցախ չեն մեկնելու, հուսով են՝ փետրվարին Արցախ էլ կգնան։
Նաիր Յան
