Հայոց ցեղասպանության զոհերի հիշատակի քանդված հուշակոթողի նկարները տարածվել են համացանցում։ Իշխանությունների՝ Հայոց ցեղասպանության իրողությունը կասկածի տակ դնելու, Թուրքիայի ու Ադրբեջանի հետ հարաբերություններում այն ջնջելու քաղաքականությունը արդարացի մտավախություն է առաջացրել հանրության շրջանում՝ ի՞նչ երաշխիքներ կան, որ Հուշարձանը վերանորոգման անվան տակ չի ոչնչացվելու։
Ժողովուրդն այնքան չի վստահում իշխանություններին, որ մտածխում է՝ եթե ոչ լիովին ոչնչացնեն, գուցե Հուշարձանը «խմբագրե՞ն» Թուրքիայի պահանջով։ Հայոց ցեղասպանության իրողությունը կասկածի տակ դնողներից, այն մերժողներից ամեն ինչ կարելի է սպասել։
Ժողովրդական առածն ասում է՝ աչքը տեսածից է վախենում։
Հանրային ցասումի մեծ ալիքին ի պատասխան՝ Հայոց ցեղասպանության թանգարան-ինստիտուտը հաղորդագրություն է տարածել՝ փորձելով ցրել մտավախությունները։
Հայտարարության մեջ ասվում է.
Շուրջ երկու ամիս է մեկնարկել է Հայոց ցեղասպանության թանգարան-ինստիտուտի հիմնանորոգման աշխատանքների երկրորդ փուլը՝ Հավերժության տաճարի թեք մույթերի և վարչական մասնաշենքի տանիքի նորոգումը: Հայոց ցեղասպանության հուշահամալիրի հիմնանորոգման ընթացքում և՛ թանգարանը, և՛ հուշահամալիրը բաց են լինելու այցելուների և պաշտոնական պատվիրակությունների համար: Այդ նպատակով մույթերը հերթով են հիմնանորոգվում, այժմ ընթանում են առաջին երկու մույթերի վերականգնման աշխատանքները:
Աշխատանքների արդյունքում կլուծվի տասնամյակների ջրահեռացման խնդիրը, որի պատճառով քայքայվել էին մույթերի քարերը’ առաջացնելով քարաթափման վտանգ, իսկ վարչական և թանգարանի մասնաշենքերում մշտապես կար անձրևաջրերի ներհոսքի խնդիր։
Նշենք, որ նախորդ տարի առաջին փուլով իրականացվել են Հայոց ցեղասպանության հուշահամալիրի հարակից կանաչապատ տարածքների ոռոգման համակարգի բարելավման աշխատանքները, որի շրջանակում Եղևնիների պուրակում գործարկվել է ոռոգման կաթիլային համակարգ։
Հիմնանորոգման ճարտարապետական խմբի ղեկավարը ՀՀ վաստակավոր ճարտարապետ Սաշուր Քալաշյանն է, որը Հայոց ցեղասպանության հուշահամալիրի և թանգարան-ինստիտուտի նախագծի համահեղինակներից է։
