Մեզ ոչ ոք չի կարող մեղադրել, քանի որ վերջին՝ առնվազն 20 տարիների ընթացքում և՛ նախագահ Պուտինը, և՛ նախագահ Մեդվեդևը առաջ են մղել ԼՂ խնդրի լուծումներ, որոնք խաղաղ բանակցությունների միջոցով արդար մոտեցում էին ապահովում։ Այս մասին այսօր Երևանում կայացած մամուլի ասուլիսի ժամանակ հայտարարեց ՌԴ արտգործնախարար Սերգեյ Լավրովը։
Ըստ Լավրովի՝ առաջարկվում էր «ադրբեջանական 7 շրջաններից 5-ը վերադարձնել՝ որպես առաջին քայլ և որպես միջանկյալ փուլ՝ պահպանել Քելբաջարի և Լաչինի շրջանները՝ Լեռնային Ղարաբաղի վերջնական կարգավիճակի հարցի վերջնական լուծումը հետաձգելով երկար տարիներով, իսկ փաստացի՝ թողնելով ապագա սերունդներին»։
ՌԴ արտգործնախարարի խոսքով՝ այն, ինչ ստացվեց (նկատի ունի Լեռնային Ղարաբաղի լիակատար օկուպացիան), հետևանքն էր այն բանի, որ «փոխզիջումային առաջարկները մերժվել էին»։
«Սակայն իրացվել է ընտրության իրավունքը՝ բանաձևից հրաժարումը», – շեշտեց Սերգեյ Լավրովը։
