Եվրոպական խորհրդարանի պատգամավոր Մարիոն Մարեշալ-Լը Պենը Եվրախորհրդարանի լիագումար նիստում հանդես է եկել ելույթով՝ կոչ անելով պատժամիջոցներ կիրառել Ադրբեջանի դեմ:
Նա, մասնավորապես, նշել է. «Մեկ տարի առաջ արցախցի փախստականներին հանդիպեցի Հայաստանում։ Նրանց հուզիչ պատմությունները մինչ օրս իմ աչքի առաջ են՝ շրջափակում և սով, սպանություններ, խաղաղ բնակչության ռմբակոծություններ, եկեղեցիների և գերեզմանատների պղծում։ Ինչպե՞ս կարելի է չդատապարտել այդ էթնիկ զտումը»։
Բացի այդ՝ ԵԽ պատգամավորը նաև կոչ է արել կոշտ պատժամիջոցներ կիրառել Բաքվի բռնապետության դեմ և բոյկոտել COP 29-ը Ադրբեջանում, քանի դեռ փախստականներին չեն տրվել իրենց հողեր անվտանգ վերադարձի երաշխիքներ, և քանի դեռ պաշտպանված չէ Արցախի մշակութային ժառանգությունը:
«Արցախից փախստականների կյանքը ոչ պակաս արժեքավոր է, քան ադրբեջանական գազը։ Հայաստանը չի կարող միայնակ մնալ Ադրբեջանի եւ Թուրքիայի էքսպանսիոնիստական նկրտումների առջև»,- ասել է Մարեշալ-Լը Պենը։
