Մեր երկու երկրների հարաբերությունները երբեք այսքան ինտենսիվ և վստահելի չեն եղել, այսօր Երևանում ՀՀ արտգործնախարար Արարատ Միրզոյանի հետ համատեղ մամուլի ասուլիսի ժամանակ ասաց Ֆրանսիայի արտաքին գործերի նախարար Ժան-Նոել Բարոն:
«Երբ իջնում էինք Երևան՝ Արարատի հայացքի ներքո, մտածում էի, որ ժամանակն է, սիրելի՛ Արարատ, պատասխանել Ձեր հրավերին և այցելել Երևան։ Մեծ ուրախությամբ եմ այստեղ գտնվում։ Սա իմ առաջին այցն է։ Ուրախություն, որը նաև հուզումնալից է, որովհետև այս տարի նշում ենք Հայոց ցեղասպանության 110-րդ տարելիցը։
Մեզ հնամյա բարեկամություն է կապում։ Ես շատ հուզված եմ, որ քիչ հետո մասնակցելու եմ ծովակալ Լուի Դարտիժ դյու Ֆուրնեի հարգանքի տուրքին, որը 1915 թվականին մասնակցել է Մուսա լեռան 4 հազար դիմադրողների փրկությանը։
Ֆրանսիան նաև շարունակում է մնալ Լեռնային Ղարաբաղից տեղահանվածների, բայց նաև՝ Հայաստանի կողքին»,- ասաց Ֆրանսիայի ԱԳ նախարարը։
Եվրոպացի բարձրաստիճան պաշտոնյան երկկողմ հարաբերություններում կարևորեց նաև պառլամենտական դիվանագիտությունը։
«Ես եկել եմ Հայաստան՝ ևս մեկ անգամ նշելու Ֆրանսիայի աջակցությունը՝ կայուն, ամբոջական և անխախտ։ Նախևառաջ աջակցություն խաղաղության համաձայնագրին, որը դժվարին բանակցությունների միջոցով եկել է համաձայնության։ Ինչպես իմ գործընկեր Մարկո Ռուբիոն է ասել՝ ժամանակն է այն ստորագրելու և վավերացնելու։ Ահա ինչ են սպասում Ֆրանսիան, ԱՄՆ և Եվրոպան՝ աջակցություն Հայաստանի սուվերենությանը, ինչպես նաև տարածքային ամբողջականությանը»,- ասաց Ֆրանսիայի արտաքին գործերի նախարար Ժան-Նոել Բարոն:
