Շատ խնդիրներ ի հայտ են գալիս այն պատճառով, որ Զինված ուժերում միջավայրը երբեմն այնպիսի խնդրահարույց վիճակներ է ունենում, որը հանգեցնում է ինքնասպանությունների, ինքնավնասումների, և սա ընդհանուր դաշտը դարձնում է խնդրահարույց, լրագրողների հետ զրույցում այսօր ասաց ՄԻՊ Անահիտ Մանասյանը։
«Այո՛, միանշանակ պետք է խոսել քաղաքացու պարտականությունների մասին, բայց միանշանակ պետք է խոսել նաև պետության պարտավորության մասին՝ բացառելու այս դեպքերը։ Միգուցե որոշակի զարգացումներ ունենք, բայց ես համարում եմ, որ այս մասով շատ խնդրահարույց թերություններ ունենք։ Պետությունն իր պարտավորությունները պետք է անմիջականորեն կատարի։
Զինված ուժերում ծառայելուց խուսափելը շատ դեպքերում դեֆորմացված մտածողության արդյունք է, ինչպես նաև այնտեղ տիրող բարքերի արդյունք է։ Պետությունն ամեն ինչ պետք է անի, որ ԶՈՒ-ում բացառի ոչ կանոնակարգային հարաբերությունները, ինքնասպանությունները, ինքնավնասումները և ցանկացած տեսակի վատ վատ վերաբերմունքի դրսևորումները»,- ասաց Անահիտ Մանասյանը։
