Երևանում ամանորյա տոնական միջոցառումների կազմակերպման համար այս տարի կծախսվի շուրջ 285 միլիոն դրամ, այսօր կայացած մամուլի ասուլիսի ժամանակ ասաց Երևանի քաղաքապետարանի աշխատակազմի մշակույթի վարչության պետի ժամանակավոր պաշտոնակատար Գոշ Սարգսյանը։
«Սուրբծննդյան տոնավաճառի դեկորացիաների և գեղարվեստական լուսավորության մասով կծախսվի 115 միլիոն, համերգների համար՝ շուրջ 60 միլիոն դրամ, իսկ դեկտեմբերի 31-ի գալա համերգի համար՝ 75 միլիոն դրամ։ Այս տարի Հանրապետության հրապարակում կրկին տեղադրված է վերգետնյա կամուրջը, որի համար կծախսվի 6.6 միլիոն դրամ»,- ասաց նա։
Լրագրողներն ասուլիսին ներկա Երևանի փոխքաղաքապետ Տիգրան Ավինյանից հետաքրքրեցին՝ տոնական օրերին օտարերկրացի զբոսաշրջիկների ինչպիսի հոսք է մայրաքաղաքում ակնկալվում։
Վերջինս պատասխանեց՝ թեև կդժվարանա հստակ կանխատեսում անել կամ թիվ նշել, սակայն փաստ է, որ 2019 թվականին գրանցվել է ռեկորդային թվով զբոսաշրջիկի՝ շուրջ 2 միլիոն մարդու այց։
«Քաղաքն ամեն տարի նվազագույնն այդ քանակը պատրաստ է ընդունել, վստահաբար հիմա էլ հյուրերի քանակը շատ մեծ է լինելու՝ կապված մանկական Եվրատեսիլի անցկացման հետ»,- ասաց նա։
