Երևանի ամանորյա լուսային ձևավորումներն այս տարի լինելու են բացառիկ, և ես վստահ եմ, որ բոլորը տպավորված են լինելու իրականացված աշխատանքներով, այսօր տեղի ունեցած մամուլի ասուլիսի ժամանակ ասաց Երևանի փոխքաղաքապետ Տիգրան Ավինյանը։
Բանախոսի տեղեկացմամբ՝ տոնական լուսավորությունը մայրաքաղաքում կմիանա մանկական Եվրատեսիլի բացման արարողությանը զուգահեռ։
«Շենքներին լույսերի փակցման հետ կապված համաքաղաքացիների անհանգստությունը փարատվելու է, քանի որ աշխատանքային խմբերից մեր առաջնային պահանջը եղել է՝ այն նվազագույն միջամտությունը, որն արվում է, հետագայում շենքերի անվնաս վերադարձ լինի նախնական տեսքին։ Տվյալ թեմայի շուրջ շատ են եղել շահարկումներ։ Բայց դեռևս շատ հին ժամանակներից այդ շենքերի վրա տարատեսակ անցքեր, մետաղական ձողեր են մնացել, որոնց վերացման աշխատանքները նույնպես գարնանը մեր ուշադրության կենտրոնում են լինելու»,- ասաց Տիգրան Ավինյանը։
Նրա խոսքով՝ վնաս, որպես այդպիսին, լուսավորության մոնտաժման հետևանքով Երևանին ընդհանրապես չի հասցվել։
Երևանի փոխքաղաքապետ Տիգրան Ավինյանը միաժամանակ տեղեկացրեց, որ Երևանի հիմնադրման 2750-ամյակին նվիրված շատրվանների պուրակում դեկտեմբերի 5-ից հունվարի 6-ը գործելու է Սուրբծննդյան տոնավաճառ։
«Ավելի քան 40 տոնական զարդարված տաղավար-տնակներում կազմակերպվելու է առևտուր՝ տարատեսակ տնտեսվարողների կողմից։
Միջոցառումների վերջին հատվածը նվիրված է լինելու համերգային ծրագրին։ Վերոնշյալ պուրակում ունենալու ենք 7 համերգ, իսկ ահա ամանորյա գալա համերգը տեղի է ունենալու դեկտեմբերի 31-ին՝ ժամը 23։00-ին, Հանրապետության հրապարակում»,- ասաց Երևանի փոխքաղաքապետը։
Հանրապետության հրապարակի շենքերին «բոլտերի» ամրացման և տոնական լուսավորության անցկացման հարցին անդրադարձավ նաև Երևանի քաղաքապետի տեղակալ Սուրեն Գրիգորյանը՝ հավաստիացնելով, որ կապալառուի հետ պայմանավորվել են, որ չի կարելի շենքերի զարդանաշխերի վրա որևէ դետալ ամրացնել։
«Մենք մեր պատմամշակութային հուշարձանների նկատմամբ երբեք նման վերաբերմունք չենք ունեցել։ Եթե անգամ ամրացվել է, լավ, բա վրայի ամրացված լուսավորությունն ո՞ւր ա։ Էդ մի հատ պրիմիտիվ հարցը մարդն իրեն տար, միանգամից կհասկանար, որ դա կապ չունի այս նախագծի հետ»,- ասաց նա՝ հավաստիացնելով, որ վերջին օրերին լրատվամիջոցներում շրջանառվող հայտնի լուսանկարում պատկերված «բոլտն» իրենց կողմից չի ամրացվել։
Լրագրողների հարցին՝ արդյոք հնարավոր չէր Հանրապետության հրապարակի տոնական լուսավորությունը կազմակերպել առանց տուֆակերտ շենքերը ծակելու, վերջինս պատասխանեց՝ կոնստրուկցիաները տեղադրվել են բավական մեծ բարձրության վրա, և պետք էր, որ դրանք բավականաչափ ամուր լինեին՝ ինչ-որ պահի չընկնելու և անցորդներին չվնասելու համար։
«Համադրված անվտանգության ապահովման անհրաժեշտությունը և նվազագույն միջամտությունն այս լուծումն է եղել»,- ասաց Սուրեն Գրիգորյանը։
