Էլվինա Մակարյանն առեղծվածային կերպար է։ Միայն նրա մտերիմներն են տեղյակ, թե ինչ տառապանքների, անձնական ողբերգության միջով է անցել երգչուհին։
14 տարեկանում արդեն նվաճել էր համամիութենական բոլոր բեմերը, 23 տարեկանում՝ «Գրան պրի»։ Նա կլիներ Հայաստանի ամենաերիտասարդ ժողովրդական արտիստուհին, եթե 18 տարեկանում չամուսնանար, լսեր մաեստրո Կոնստանտին Օրբելյանին, որն էլ հենց նրան այդ տիտղոսը խոստացել էր։
Բայց հախուռն, անբռնազբոս, բոհեմական Էլվինան նետվում էր կյանքի գիրկը՝ անպատրաստ նրա պատճառած դառնություններին։
1994 թվականին մեկնեց ԱՄՆ, որովհետև տեսավ, թե Հայրենիքում որքան անհանդուրժող ու չար են մարդիկ իրական տաղանդի նկատմամբ, ինչպես են ջանում ստվերում թողնել իրեն։ Դառնացած, վիրավորված՝ հեռացավ։ Բայց անընդհատ սպասում էր, որ Հայրենիքից կկանչեն իրեն, կասեն, որ իր կարիքն ունեն, որ հանդիսատեսը, դահլիճները սպասում են իրեն։ Ու միայն 2007-ին, երբ կորցրել էր սիրելի որդուն, մայրն էլ էր մահացել, մենության մեջ տառապող Էլվինան Հայաստանից զանգ ստացավ՝ Երևանում Ձեր մենահամերգն է լինելու, եկեք։
Էլվինայի սրտում հույսի շող ծագեց, մենության խավարի, դեպրեսիայի մեջ նա վերագտավ ապրելու իմաստը՝ Հայրենիքից կանչում են իրեն։
Այս մեկ զանգի վրա է հյուսվել մի ամբողջ մոնոներկայացում, որ բեմադրել է ռեժիսոր Արթուր Սահակյանը։
Սցենարի հեղինակը լրագրող Ռուզան Մինասյանն է, որը մտերիմ է եղել Էլվինա Մակարյանի հետ, հաճախ է նրա տանը եղել, նրա հետ զրույցները ձայնագրել։ Ահա Ռուզան Մինասյանի և Արթուր Սահակյանի ձայնագրություններն էլ դարձել են «Էլվինա Մակարյան. չկայացած համերգ» երաժշտական բեմադրության հիմքը։
Էլվինա Մակարյանի դերում երգչուհի Իլոնա Սագիևան է, որը դեռ 13 տարեկանից տարված է եղել Էլվինա Մակարյանով, նրան նման է արտաքնապես, նաև ձայնի երանգով։
Երգի պետական թատրոնում Իլոնա Սագիևան մեն-մենակ և՛ խաղում է, և՛ երգում՝ հանդիսատեսի հետ զրուցելով, նրան իր ապրումների մասնակիցը դարձնելով, ծիծաղելով ու արտասվելով, հրճվելով ու դառնանալով։
Բայց մարում է նաև հույսի վերջին հողը, նորից զանգ է ստանում Երևանից՝ ինչ-ինչ պատճառներով համերգը չի կարող տեղի ունենալ։
Ահա և վերջ։ Կյանքի հետ կապող վերջին թելն էլ կտրվեց…
2 ամիս անց Էլվինային գտնում են Ամերիկայի իր բնակարանում անշնչացած։ Նա ինքնասպան էր եղել։
