Գույժ. ՌՈՄԵՆ ԿՈԶՄՈՅԱՆ

Կարճատեւ հիվանդությունից հետո, այսօր, ապրիլի 12-ի առավոտյան կյանքից հեռացավ ազգային-պետական եւ հասարակական գործիչ, գործընկերների շրջանակում բարձրորեն գնահատված եւ հարգված, սփյուռքահայությանը քաջածանոթ բարեկամ, մեր թերթի աջակից եւ հեղինակ Ռոմեն Կոզմոյի Կոզմոյանը։

Ռոմեն Կոզմոյանը ԱԱԾ պաշտոնաթող սպա էր, գնդապետ, այն բացառիկ անձնավորություններից, որոնք գիտեն իրենց գիտելիքները, դիրքն ու կապերը օգտագործել մարդկանց՝ հատկապես մտավորականներին օգնելու, մայր հայրենիքում ներդրում կատարելու ցանկություն ունեցողների գործը հեշտացնելու, ազգաշեն բոլոր նախաձեռնությունները քաջալերելու համար։

Այդ եւ այլ հատկանիշների շնորհիվ Ռոմեն Կոզմոյանը արդյունավետ աշխատանք է կատարել Սփյուռքահայության հետ մշակութային կապի կոմիտեում թե՛ Վարդգես Համազասպյանի, թե՛ Կառլեն Դալլաքյանի նախագահության տարիներին եւ թե՛ Բեյրութի սովետական դեսպանատանը՝ Լիբանանի քաղաքացիական պատերազմի տարիներին եւ այնուհետեւ։ Նա պատկանում էր, Կ. Դալլաքյանի բնորոշմամբ, հայ կոմունիստների խմբին, ի տարբերություն կոմունիստ հայերի…

Օժտված էր բազմափորձ իր կյանքի տարբեր պահերը իմաստավորելու, հանդիպած մարդկանց նկարագիրն ու գործունեությունը նուրբ եւ բարեհոգի հումորով ներկայացնելու անուրանալի տաղանդով։

Ռոմեն Կոզմոյանը իրեն ճանաչողների մտքում եւ հոգում կմնա որպես բանիմաց, սրտացավ, օգնելու միշտ պատրաստ անձնավորություն, մնայուն բարեկամ եւ հավատարիմ ընկեր։

Յիշատակն արդարոյն օրհնութեամբ եղիցի։

* * *

«Ազգ»ի խմբագրությունը վշտակցում եւ երկնառաք մխիթարություն է մաղթում որդուն՝ Դավիթին, դստերը՝ Մելանյային, քրոջը՝ Արմանուշին, եղբորը՝ Վահագնին ու մյուս բոլոր հարազատներին եւ ընկերներին։

* * *

Հոգեհանգստյան արարողությունը տեղի կունենա վաղը՝ ապրիլի 13-ին, ժամը 18։00-20։00-ին, Ջրվեժի «Անդորր» սգո սրահում (բենզալցակայանի մոտ)։

Հուղարկավորությունը՝ ապրիլի 14-ին, ժամը 13։00-ին, նույն վայրից։