Նիկոլ Փաշինյանի իշխանությունը թշնական ռեժիմ է, ապօրինի իշխանություն, որովհետև Փաշինյանը տիրացել է հայ ժողովրդի իշխանությանը բացառապես խարդախության, խաբեության և իշխանազավթման միջոցով և հիմա էլ ապօրինություններով փորձում է պահել այդ իշխանությունը։ Ուղիղ եթերում այս մասին այսօր ասաց Լեհաստանում ՀՀ նախկին դեսպան Էդգար Ղազարյանը՝ անդրադառնալով Նիկոլ Փաշինյանին անվստահություն հայտնելու գործընթացին։
Ըստ Ղազարյանի՝ Նիկոլ Փաշինյանը սեփական իշխանությունը ծառայեցնում է թուրք-ադրբեջանական շահերին, ինչն էլ հանգեցնում է տարածքային, մարդկային և նյութական ահռելի կորուստների։
«Հետևաբար այս աղետը կանխելու համար անհրաժեշտ է, որպեսզի Նիկոլ Փաշինյանը հեռացվի իշխանությունից, իսկ դրա համար 4 հնարավոր տարբերակներ կան։ Մեկը նրա մահն է, բայց դա որևէ մեկից կախված չէ, դա Աստծու ձեռքում է։ Մյուսը քրեական վարույթն է, որը պետք է նախաձեռնի դատախազը, նրան մեղադրանք առաջադրվի և քննիչի որոշմամբ կասեցվեն նրա լիազորությունները։ Սա դժվար և քիչ հավանական է՝ գործող դատախազ Աննա Վարդապետյանի պարագայում։ Երրորդ ճանապարհը Փաշինյանի հրաժարականն է, որի պահանջը վաղուց է ներկայացված։ Այս պահանջով եղել են բազմաթիվ շարժումներ։ Մյուս տարբերակը 2026 թվականի ընտրություններին սպասելն է, որպեսզի քաղաքացիները չքվեարկեն և Փաշինյանը չշարունակի մնալ իշխանության ղեկին։
Այս տարբերակը գործնականում պետք է բացառել, որովհետև վերջին շրջանում նա իրականացնում է իշխանազավթում։ Ընտրությունները նրա համար ոչ թե իշխանություն ձևավորելու, այլ իշխանությունը պահպանելու միջոց են՝ առավել ևս հիմա, երբ Հայաստանում հաստատվել է տոտալ բռնապետական համակարգ, վերահսկվում են ԶԼՄ-ները, իրավապահ մարմինների միջոցով բռնաճնշումներ են իրականացվում ընդդիմախոսների նկատմամբ, չեն վերահսկվում Փաշինյանի և ՔՊ-ի ֆինանսական միջոցները, ԿԸՀ նախագահն է Փաշինյանի նախկին օգնական Վահագն Հովակիմյանը, ՍԴ նախորդ կազմից էլ դատավոր է մնացել միայն Հրայր Թովմասյանը։ Այսինքն՝ այս պարագայում մտածել, որ հնարավոր է ընտրությունների միջոցով գնալ Նիկոլ Փաշինյանին իշխանությունից հեռացնելու, գործնականում բացառվում է։
Հիմա բոլոր հնարավոր տարբերակներից մնում է մեկը՝ դա ԱԺ-ի միջոցով վարչապետին անվստահություն հայտնելն է»,- ասաց Էդգար Ղազարյանը։
Նա հիշեցրեց, որ անվստահության գործընթացի մեկնարկի համար անհրաժեշտ է 54 ձայն։
«Ընդ որում՝ այդ 54-ի կեսն իրենց հռչակել են ընդդիմադիր պատգամավորներ, այսինքն՝ եթե հավատանք, որ նրանք հավատարիմ են իրենց խոստմանը և իրոք ցանկանում են Փաշինյանին հեռացնել իշխանությունից, ապա մնում է այդ որոշման համար 20 մարդու ձայն։ Պետք է այդ 20 մարդուց պահանջել, որպեսզի իրենց պաշտոնական պարտականությունները կատարեն՝ վերահսկել կառավարության գործունեությունը, շեղումների դեպքում անվստահություն հայտնել վարչապետին։ Սա պարզ, օրինական պահանջ է, որին պետք է մասնակցի ընդամենը 20 մարդ։
Այս ճանապարհից ոչ թե պետք խուսափել, հակաքարոզչություն անել, այլ հակառակը՝ մեկտեղել բոլորիս ջանքերը»,-ասաց Ղազարյանը՝ նշելով, որ որքան էլ այս ճանապարհը դժվար է, միևնույն է, այն իշխանափոխության տանող միակ ճանապարհն է։
Ըստ Լեհաստանում ՀՀ նախկին դեսպանի՝ Փաշինյանին անվստահություն հայտնելու գործընթացում ԱԺ բոլոր պատգամավորներին ներգրավելու համար ապրիլի 28-ին նույնաբովանդակ նամակներ են հանձնել վերջիններիս։
«Ամբողջ նամակը հղում է Սահմանադրությանը։ Պատգամավորներին ասել ենք, որ մեզ պատասխանելու տրամաբանական վերջնաժամկետը մայիսի 8-ն է»,- ասաց Ղազարյանը՝ հավելելով, որ մինչ այս պահը պատասխան նամակ ստացել են ՔՊ-ական պատգամավոր Թագուհի Ղազարյանից, ով նշել է, որ գոհ է ՀՀ կառավարությունից և Փաշինյանին անվստահության հայտնելու հիմքեր չի տեսնում։
