Իշխանություններն արդեն բացահայտ, առանց խուսափելու ցույց են տալիս, որ ձեռքերը լվացել են Արցախից: «Փաստինֆո»-ի հետ զրույցում արձանագրել է քաղտեխնոլոգ Արմեն Բադալյանը:
Նկատենք, որ եթե մինչ այս Հայաստանի իշխանությունները տարբեր կերպ փորձում էին խուսափել Արցախի հետ կապված հարցերից, այժմ բացահայտ հայտարարում են, որ բանակցային այս փուլում նպատակահարմար չէ «Լեռնային Ղարաբաղի Հանրապետություն» հանրապետությունը, որ չեն այցելելու Արցախ ու անգամ սադրանք են որակում այլ ընդդիմադիր գործիչների Արցախ այցելելը և Արցախի դրոշը տեղադրելը:
Ըստ քաղտեխնոլոգ Արմեն Բադալյանի՝ իշխանության այս կտրուկ վարքագծի պատճառն այն է, որ Արցախի հարցի հետ կապված բանակցություններն մոտենում են որոշակի հանգուցալուծման: Զրուցակցի արձանագրմամբ՝ ակտիվ գործընթաց է գնում, որը մոտենում է տվյալ փուլի իր ավարտին.
«Բրյուսելում օրեր առաջ հանդիպեցին Փաշինյանն ու Ալիևը, հավանաբար, եկել են այն եզրակացության, որ մինչև ապրիլի վերջ արդեն կոնկրետ փաստաթուղթ պետք է լինի: Այսինքն՝ Հայաստան-Ադրբեջան բանակցային այս գործընթացը, որն էականորեն արագացվում է Արևմուտքի և ԵՄ-ի կողմից, հանգեցնում է նրան, որ ապրիլի վերջին լինի ինչ-որ ստորագրված փաստաթուղթ և այս կոնտեքստում Հայաստանի ղեկավարները չեն կարող իրենց դիվանագիտական սեթևեթանքներ թույլ տալ, մեկնել Արցախ, խոսել Արցախի մասին, այլևս չեն կարող, որովհետև մոտեցել են վերջին կետին»,-ասաց Բադալյանը:
Իսկ թե ի՞նչ փաստաթղթի մասին է խոսքը, քաղտեխնոլոգը փակագծեր բացեց.
«Բրյուսելում ձեռք է բերվել պայմանավորվածություն, որ ապրիլի վերջին պետք է արդեն կոնկրետություն լինի Ադրբեջանի արտահայտած հինգ կետերի վերաբերյալ, դա չի նշանակում, որ այդպես լինելու է, որովհետև մինչ այդ Հայաստանի ղեկավարը գնալու է Մոսկվա՝ Պուտինի հետ հանդիպելու, դժվար է ասել՝ հանդիպումը ինչ արդյունք կունենան»։
Ինչ վերաբերում է ընդդիմության Արցախ մեկնելուն, Արցախի դրոշը Հայաստանի տարբեր քաղաքներում և մարզերում տեղադրելում, Արմեն Բադալյանը նկատում է՝
ընդդիմությունը փորձում է Արցախի հարցը մոռացության չմատնել և մշտապես պահել օրակարգում՝ ի հակառակ իշխանությունների.
«Դրա համար են Արցախի դրոշ բարձրացնում, մարզեր գնում, Արցախ գնում, սա, կարելի է ասել, արցախյան նոր շարժման նախակարապետն է»,-ասաց Բադալյանը:
Աղբյուր` Փաստինֆո
