Ատելության խոսքը, հայհոյանքը հենց Փաշինյանի հետ են մտել քաղաքակն դաշտ, ցինիզմն ու թշնամանքը հենց նրա հեղիանկային իրավունքն են, այսօր տեղի ունեցած մամուլի ասուլիսի ժամանակ ասաց քաղաքագետ, ԲՀԿ պատգամավորության թեկնածու Սուրեն Սուրենյանը։
«Հանգիստ քարոզարշավ էր սկսվել, 3-4 օր առանցքային քաղաքական ուժերը պտտվում էին տարբեր քաղաքաներում ու մարզերում, ներկայացնում իրենց մոտեցումները։ Ընդ որում՝ ընդդիմադիր ուժերը առաջինը չեն նախաձեռնել անձնական թիրախավորումը, մրցակցին ոչնչացնելու մոլուցքով չեն տառապել։ Առաջինը Նիկոլ Փաշինյանը սկսեց այն, ինչ իրեն է բնարոշ։ Այդ մարդն ընդդիմություն կլինի, թե իշխանություն կլինի, մեկ է՝ մարդու բնույթը չի փոխվում»,- ասաց բանախոսը՝ հիշեցնելով, որ ոչ վաղ անցյալում նույ Փաշինյանը հայտարարում էր՝ ՔՊ-ն էթիկայի կանոնագիրք է ընդունել ավելի տոլեռանտ և հարգալից լինելու համար։
Ըստ Սուրեն Սուրենյանցի՝ Փաշինյանի այդ հայտարարությունից անցել է հազիվ մեկ ամիս, և նա արդեն երեկ բացահայտորեն խախտել է իր իսկ կողմից անոնսած կանոնագիրքը։
«Հերթական անգամ ապացուցվեց, որ Նիկոլ Փաշինյանը և հետևողականությունը հակոտնյա հասկացություններ են։
Նա երեկ բացահայտ սպառնալիք հնչեցրեց ԲՀԿ ղեկավար Գագիկ Ծառուկյանի հասցեին։ Այսինքն՝ որևէ մեկը, ով քննադատում է Փաշինյանին կամ հավակնում է ազդեցիկ լինել, միանգամից արժանանում է նրա բացահայտ սպառնալիքին։
Բայց ավելի վատն այն է, որ երեկվա այդ սպառնալիքից հետո դատախազությունը հաղորդագրություն է տարածում, որ դիմել են Բելառուսին՝ Նվեր Ծառուկյանին ՀՀ իրավապահ մարմիններին հանձնելու հարցով։ Սա դեմոկրատիայի բոլոր սկզբունքների խախտում է։ Պետության ղեկավարը հնչեցնում է սպառնալիք, որը դառնում է իրավապահ մարմինների պատժիչ գործիքակազմ, քաղաքական պատվերի դրսևորում։ Այսինքն՝ պետական ինստիտուտներն այն աստիճանի են արժեզրկվում, որ դառնում են Նիկոլ Փաշինյանի անձնական քաղաքական հաշվեհարդարի գործիքը։ Իսկ 10 օր առաջ բոլորը եվրոպացի էին դարձել»,- ասաց քաղաքագետը։
Սուրեն Սուրենյանցը շեշտեց՝ ԲՀԿ առաջնորդի նկատմամբ Փաշինյանի սպառնալիքներն ինդիկատոր են, որ վերջինից ամենաշատն է վախենում։
«Նա ինչ-որ ինֆորմացիաների հիման վրա կորցնում է ինքնատիրապետումը, և սա խոսում է երկու բանի մասին. մի կողմից բացահայտվում են Փաշինյանի վախերը, որ այլևս չի տիրապետում իրավիճակին, մյուս կողմից՝ իշխանությունն ամեն գնով պահելու մոլուցքով ռեպրեսիվ հրամաններ է տալիս։ Ըստ էության՝ նա փողոցային բառապաշարով դատախազին հրահանգ է տվել։
Բան ունես՝ մրցակցիդ ծրագրի, ասելիքի և կերպարի հետ վիճի։ Հարց՝ նո՞ր իմացավ, որ Նվեր Ծառուկյանը երկրում չի, այսինքն՝ ընտրողական արդարադատությունն իրավական պետության գերեզմանափորն է։ Առնվազն մեկ տարի է՝ այս մարդն իրական արդարադատության գերեզմանափոր է դարձել»,- նշեց Սուրենյանցը։
