Հայաստանի և Ադրբեջանի միջև խաղաղության ուղին հույժ կարևոր է, և ժողովրդի բարգավաճման և բիզնես ոլորտի համար նախապայմանները, առևտրի միջանցքները Եվրոպայի և աշխարհի մյուս երկրների միջև հենց խաղաղության նախապայմանն է, ՀՀ արտգործնախարար Արարատ Միրզոյանի հետ համատեղ մամուլի ասուլիսի ժամանակ այսօր հայտարարեց Էստոնիայի ԱԳ նախարար Մարգուս Ցահքնան։
«Սա հսկայական աշխարհաքաղաքական փոփոխություն է։ Այն, ինչ դուք անում եք հայ ժողովրդի համար, տարածշրջանի համար, մենք ուզում ենք դրա մի մասը լինել, աջակցել դրան, ուզում ենք մեր փորձառությամբ կիսվել»,- ասաց էստոնացի նախարարը։
Նա շեշտեց՝ այսօր Հայաստանի և Էստոնիայի միջև կնքված փոխըմբռնման հուշագիրը նպատակ ունի առավել ընդլայնելու երկկողմ փոխգործակցությունը։
Մարգուս Ցահքնան կանգ առավ հատկապես կիբերանվտանգության խնդիրների և այս ոլորտում Հայաստանի հետ համագործակցության վրա։
«Սա իսկապես կարողությունէ , որ Էստոնիան ունի։ 2024-ին մենք ունեցանք պետական և մասնավոր ոլորտի վրա մոտ 7 հազար լուրջ կիբերհարձակում։ Անցած տարի ունեցանք մոտ 12 հազար կիբերհարձակման դեպքեր։ Ռուսաստանը և Հյուսիսային Կորեան հիմնական դերակատարներն են»,- ասաց էստոնացի նախարարը։
Ըստ Մարգուս Ցահքնայի՝ եթե Հայաստանն Էստոնիայից սովորելու բան ունի կիբերհանցագործության կանխման ոլորտում, ապա Էստոնիան Հայաստանից՝ ընտրական գործընթացների։
«Դուք առաջիկայում ունեք ընտրություններ, և անչափ կարևոր է, որ դրանք լինեն ժողովրդավար, թափանցիկ ։ Մենք տեսնում ենք, որ Հայաստանի շուրջ շատ մեծ ուժեր կան՝ Ռուսաստան և ուրիշներ, որոնք այնքան էլ ուրախ չեն ժողովրդի ազատ կամքի ընտրության համար։ Սա է այն ուղին, սա է այն հիմքը, որի արգասիքը լինելու է թափանցիկությունը»,- ամփոփեց էստոնացի նախարարը։
