Երևանի փոխքաղաքապետ Սուրեն Գրիգորյանը տեղյակ չէ վարչապետ Նիկոլ Փաշինյանի՝ ընդդիմադիրների հասցեին հնչեցրած վիրավորական արտահայտությունների մասին: Այս մասին նա հայտարարեց,լ երբ լրագրողները հետաքրքրվեցին՝ ինչպես է վերաբերվում վարչապետի տիկնոջ գրառումներին, երբ նա վիրավորում է քաղաքացիներին՝ նրանց անվանելով, օրինակ, ոջիլ, տգետ:
«Ընդհանուր առմամբ վիրավորանքի, ատելության խոսքի վերաբերյալ մեր դիրքորոշումը մենք բազմիցս արտահայտել ենք: Մենք այդ դիրքորոշումն արտահայտել ենք ոչ միայն խոսքերով, այլ նաև ատելության խոսքը քրեականացնող կոնկրետ հոդվածներ են ընդունվել»,- ասաց նա:
Ըստ Գրիգորյանի՝ որքան մոտենում է ընտրությունների փուլը, այնքան քաղաքական բանավեճը, քաղաքական հայտարարությունները միմյանց նկատմամբ թեժանում են:
«Ընտրությունների մոտենալուն պես այդ խոսույթը թեժանում է, իսկ ընտրություններից հետո որոշակի մեղմվում է, հետո մյուս ընտրություններին ընդառաջ էլի թեժանում է: Դա կլինենք մենք, թե կլինեն մեր ընդդիմախոսները, թե 30, 100 տարի հետո կլինեն այլ գործիչներ, այդ օրինաչփությունը չի փոխվելու»,- ասաց նա:
Գրիգորյանը ևս մեկ անգամ շեշտեց, որ Աննա Հակոբյանի այդ գրառումներին ծանոթ չէ:
