«Հայոց պատմություն» առարկա այլևս չկա։ Դասավանդվող առարկայի անունը «Հայաստանի պատմություն» է։
Կառավարության այսօրվա նիստին որոշումն ընդունվեց։
«Ծրագրի բովանդակության մեջ հիմնականում շեշտադրվելու են պետականության վերականգնմանը, արժևորմանը և պահպանմանը վերաբերող փաստերը, պատմական իրողությունները, իրադարձություններ։․ Փոխվում է այդ իրադարձությունների և երևույթների մեկնաբանման մեթոդաբանական սկզբունքը, որը դառնում է պետության հետագա գոյության, զարգացման տեսանկյունից պատմական իրողությունների վերարժևորման դիտանկյուն։ Մասնավորապես, օրինակ, այս կերպ կարող են նորովի վերագնահատվել պատմական բոլոր այն իրադարձությունները, երբ տեղի է ունեցել պետության կորուստ՝ սովորողների մոտ ձևավորելով հնարավոր մարտահրավերների նկատմամբ ավելի վերլուծական, քննական հայացք, ինչպես նաև ամրապնդելով այն արժեքային կողմնորոշումը, որ պետությունը ժողովրդի և ազգի կազմակերպման բարձրագույն ձևն է, ու դա պետք է ամրապնդել։
Սովորողները հնարավորություն են ստանում նորովի վերաիմաստավորել բոլոր այն ժամանակահատվածները, երբ պետությունը և պետական համակարգը չեն գործել: Սովորողը կկարողանա համեմատել ու համադրել այն մարտահրավերները, որն ունեցել է հայ ժողովուրդը պետության բացակայության պայմաններում»,- Կառավարության նիստին «Հայոց պատմություն» առաևկայի նպատակը ներկայացրեց ԿԳՄՍ նախարար Ժաննա Անդրեասյանը։
Փաշինյանը, ինչպես նախկինում, այսօր էլ շեշտեց, որ առարկայի հիմքում պետք է դրվի անկախության ու ինքնիշխանության պահպանումը։ Նրա կարծիքով էմոցիաների ժողովեւրդը պետք է վերածվի պետական ժողովրդի։
«Պետք է արձանագրեմ, որ պետությունը բոլորովին ուրիշ մտածողություն է ու մշակույթ, բոլորովին ուրիշ հայեցակետ է։
Պետք է ուժ ունենանք խոսոտվանելու, որ այդ մտածողությունը միշտ ու ամենուր չէ, որ հասանելի է մեզ։ Ո՞րն է տարբերությունը «Հայոց պատմության» և «Հայաստանի պատմության»։
«Հայաստանի պատմությունը» պետության գոյության զարգացման պատմությունն է՝ պետության չգոյության դրվագներով, իսկ «Հայոց պատմությունը» պետության չգոյությունն է պետության գոյության դրվագներով։ Սա կարևոր հայեցակարգային տրամաբանություն է»։
