Միացյալ Նահանգները և Մեծ Բրիտանիան նոր ավիահարվածներ են հասցրել Եմենում հութիների դիրքերին. Հայտնում է РИА Новости-ն ՝ հղում անելով տեղի ռազմական աղբյուրին։
«ԱՄՆ-ի և բրիտանական ռազմական ինքնաթիռները գրոհում են Անսար Ալլահի թիրախները Կարմիր ծովի հյուսիսային ափամերձ Հոդեյդա նահանգի Ալ-Լուհիա շրջանում»:
Ավելի վաղ լիբանանյան «Հըզբոլլահ» շարժման գլխավոր քարտուղար Հասան Նասրալլան հայտարարել էր, որ ԱՄՆ-ի հարվածները Եմենին վտանգում են Կարմիր ծովում նավագնացությունը՝ սպառնալով նույնիսկ այն նավերին, որոնք կապ չունեն հակամարտության հետ։
Միաժամանակ նա նշել է, որ ամերիկացիները չեն կանխի հութիների հարձակումները իսրայելական նավերի վրա։
Հիշեցնենք, որ հունվարի 12-ի գիշերը ԱՄՆ-ը և Մեծ Բրիտանիան հարվածներ են հասցրել նաև Եմենի չորս նահանգների թիրախներին։
Հութիները հայտարարել են բրիտանական և ամերիկյան ռազմաբազաների վրա պատասխան հարձակումների մասին։
Ամերիկայի նախագահ Ջո Բայդենը Եմենի վրա ավիահարվածներն անվանել է նավարկության ազատության սպառնալիքի պատասխան և խոստացել է ապագայում «գործել առանց վարանելու»։ Նա նաև պնդել է, որ հութիների 27 հարձակումների հետևանքով վնասվել են ավելի քան 50 երկրների առևտրային նավեր։
