ԱՄՆ-ն ներգրավված չէ Իսրայելի կողմից Իրանի դեմ իրականացվող գործողության մեջ։ Բացի այդ, Վաշինգտոնը որևէ օգնություն չի ցուցաբերել Երուսաղեմին։ Այս մասին հայտարարել է ԱՄՆ պետքարտուղար Մարկո Ռուբիոն, որին մեջբերել է CNN-ը։
Իսրայելական և արևմտյան լրատվամիջոցները հայտարարել են, որ Միացյալ Նահանգները ներգրավված չէ Իսրայելի գործողության մեջ։ Ռուբիոն հաստատել է այս տեղեկատվությունը։
«Այսօր երեկոյան Իսրայելը միակողմանի գործողություններ է ձեռնարկել Իրանի դեմ։ Մենք ներգրավված չենք Իրանի դեմ ուղղված հարվածներում, և մեր գլխավոր առաջնահերթությունը տարածաշրջանում ամերիկյան ուժերի պաշտպանությունն է», – ասել է պետքարտուղարը։
Նա հավելել է, որ Իսրայելը Միացյալ Նահանգներին տեղեկացրել է, որ գործողությունը անհրաժեշտ է ինքնապաշտպանության համար: Ռուբիոն նաև զգուշացրել է Իրանին չհարձակվել ԱՄՆ ուժերի վրա։
«Նախագահ Թրամփը և վարչակազմը ձեռնարկել են բոլոր անհրաժեշտ քայլերը մեր ուժերը պաշտպանելու համար և սերտ կապի մեջ են մեր տարածաշրջանային գործընկերների հետ: Թույլ տվեք հստակեցնել. Իրանը չպետք է հարձակվի ԱՄՆ շահերի կամ անձնակազմի վրա», – ընդգծել է Ռուբիոն:
