Այդ մասին տեղեկությունը երեկ է հայտնվել սոցիալական ցանցերում և տարածվել որոշ երկրորդական ԶԼՄ-ներով, ընդ որում՝ բացառապես ադրբեջաներեն լեզվով։ Ըստ ամենայնի, ԶԼՄ-ներին ցուցում է տրվել չշեշտադրել այս «ականավոր իրադարձությունը»։ Սոցիալական ցանցերի հաղորդագրությունների համաձայն՝ Սաֆարովին շնորհվել է գնդապետի կոչում։ Հիշեցնենք, որ փոխգնդապետի կոչումը (այսինքն՝ լեյտենանտ-գնդապետի) նրան շնորհվել էր 2017 թվականին։
2004 թվականի փետրվարին Բուդապեշտում անցկացվել են ՆԱՏՕ-ի «Գործընկերություն հանուն խաղաղության» ծրագրի շրջանակում անգլերենի դասընթացները։ Դրանց մասնակցել են հայ և ադրբեջանցի սպաներ, այդ թվում՝ ապագա զոհ Գուրգեն Մարգարյանը և նրա մարդասպան Ռամիլ Սաֆարովը։ Փետրվարի 19-ի գիշերը Սաֆարովը մտել է չկողպված սենյակ և կացնով սպանել քնած Գուրգեն Մարգարյանին։ Դրանից հետո Սաֆարովը փորձել է սպանել երկրորդ հայ սպային՝ Հայկ Մակուչյանին։ Բարեբախտաբար, փորձն անհաջող է եղել և սենյակի դուռը կողպված է եղել։
2006 թվականի ապրիլի 13-ին Սաֆարովը, այդ թվում հայ փաստաբան Նազելի Վարդանյանի ջանքերով, Բուդապեշտի դատարանի կողմից դատապարտվել է ցմահ ազատազրկման՝ 30 տարվա ընթացքում առանց ներման իրավունքի։ Դատարանում Սաֆարովը փոխել է ցուցմունքները՝ հրաժարվել է նախնական հայտարարություններից՝ դա պատճառաբանելով նրանով, որ վատ է տիրապետում ռուսերենին և անգլերենին։
2008 թվականին Երևան կատարած այցի ժամանակ, այդ ժամանակվա Հունգարիայի արտգործնախարար Քինգա Գյոնցը՝ պատասխանելով Սաֆարովին Ադրբեջան վերադարձնելու հնարավորության մասին հարցին, նշել է, որ նման հնարավորություն կա, սակայն Հունգարիան նման պարտավորություն չունի։ «Ռամիլ Սաֆարովի արարքը հունգարական հանրության համար եղել է ցնցում և զարհուրանք։ Սաֆարովին վերադարձնելու հնարավորություն կա, բայց Հունգարիան նման պարտավորություն չունի։ Սաֆարովին վերաբերող բոլոր հարցերը կքննարկվեն շատ լրջորեն։ Ամենակարևոր հարցն այն է, թե արդյոք Սաֆարովը Ադրբեջանում կկրի՞ ցմահ ազատազրկումը, թե՞ ոչ», — հայտարարել է նախարարը։
Մի քանի տարի անց այդ երկրի իշխանությունները՝ ի դեմս վարչապետ Վիկտոր Օրբանի, գործարք են կնքել Ադրբեջանի իշխանությունների հետ։ Թույլ տալով իրենց կաշառել ադրբեջանական նավթադոլարներով՝ Հունգարիան արդարության և օրինականության գաղափարը փոխանակել է միանգամյա շահի հետ։ Ռամիլ Սաֆարովը վերադարձվել է հայրենիք, որտեղ նա անմիջապես ազատ է արձակվել և բարձրացվել հերոսի աստիճանի։ Նույն օրը՝ 2012 թվականի օգոստոսի 31-ին, Հայաստանը խզել է Հունգարիայի հետ դիվանագիտական հարաբերությունները։ Հարաբերությունները վերականգնվել են համեմատաբար վերջերս։
Ե՛վ Սաֆարովը, և՛ Ադրբեջանի իշխանությունները, մինչ օրս բացարձակապես անպատիժ են մնացել։
