Հայաստանում ժողովրդավարության մասին խոսելը նույնիսկ անհարմար է։ Ամոթ է անգամ անդրադառնալ իշխանության ներկայացուցիչների այն հայտարարությանը, որ «Հայաստանը ժողովրդավարության բաստիոն է», Azg.am-ի թղթակցի հետ զրույցում ասաց իրավապաշտպան Ժաննա Ալեքսանյանը՝ անդրադառնալով հասարակական գործիչ Միհրան Հակոբյանի վրա երեկ դիմակավորված անձանց հարձակվելու և վերջինիս ծեծի ենթարկելու միջադեպին։
«Սուտը, կեղծիքը, հանցագործությունների չբացահայտումը, Սրբազանների ապօրինի ձերբակալությունները, վարչապետի՝ Սահմանադրությունն անկաշկանդ խախտելն ու ոտնատակ տալը… այս ամենից հետո ի՞նչ եք սպասում, որ այս երկրում լինի։ Այս ամենի ֆոնին ես բռնությունը բնական եմ համարում. գիտեն, որ անպատիժ են մնալու։
Միհրան Հակոբյանի նկատմամբ բռնությունը խիստ դատապարտելի է, և եթե այս իշխանություններն ուզեին, ապա հանցագործությունը հեշտությամբ կարող էին բացահայտել։
Եվ Նիկոլ Փաշինյանը հայտարարում է, որ բռնությունը դատապարտո՞ւմ է։ Դեպքի վայրում տեսախցիկներ են եղել. բա ինչո՞ւ չեն բացահայտել մինչև այս պահը։ Ի՞նչն է դատապարտում. երբ ինքը եկեղեցում է, և այնտեղ մարդկանց բերանը փակելով՝ դո՞ւրս են շպրտում։ Դա բնությո՞ւն չէ»,- հարց հնչեցրեց իրավապաշտպանը։
Ըստ Ժաննա Ալեքսանյանի՝ ակնհայտ է, որ մարդիկ դատապարտվում են ազատ խոսքի, այլակարծության համար, և ունենալով նաև նախորդ տարիների ընտրական պրոցեսների փորձը՝ կարելի է միանշանակ ասել՝ ընտրություններին ընդառաջ՝ բռնություններն ահագնանում են, բռնության են ենթարկվում անգամ լրատվամիջոցների ներկայացուցիչները։
«Իսկ հիմա այն, ինչ կատարվում է Հայաստանում, ուղղակի տանում է դեպի բռնություն. այս անպատժելիությունը, ապօրինությունները, սուտն ու կեղծիքը կամ Միքայել Աջապահյանի առողջական վատ վիճակը։ Իսկ ՀՀ արդարադատության նախարարը երեկ բացահայտ ստում էր, որ թող իրենց դիմեն, իրենք այդ հարցին ընթացք կտան։ Բայց պարզվեց՝ փաստաբանները դիմել են, և նախարարն ուղղակի ստում էր։
Այսինքն՝ մեծահասակ մարդը, որը բանտում է, և ունի հրատապ լուծում պահանջող առողջական խնդիրներ, ոչինչ. իրենք ամենայն հանգստությամբ ստում են և այդ մարդուն անտեսում։ Սա խոսում է երկրում առկա մթնոլորտի մասին։
Բայց որևէ մեկը չի մտածում կարգի հրավիրելու մասին. մեր ՆԳ նախարարությունը, ԱԱԾ-ն ծառայում են ոչ թե Հայաստանի Հանրապետությանը և ՀՀ քաղաքացուն, այլ մեկ մարդու, և այդ մեկ մարդը Նիկոլ Փաշինյանն է։ Անգամ շրջապատում են եկեղեցին, որ նա հանգիստ մուտքուելք անի, քաղաքացներին արգելում են մտնել եկեղեցի։ Օրենքն անընդհատ խախտվում է»,- ասաց Ժաննա Ալեքսանյանը։
Իրավապաշտպանը միաժամանակ հիշեցրեց «Իմնեմնիմի» փոդքասթի հեղինակներ Նարեկ Սամսոնյանի և Վազգեն Սաղաթելյանի՝ երկու մասով կալանքի մեջ գտնվելու մասին։
«Այսինքն՝ ԱԺ նախագահ Ալեն Սիմոնյանը նրանց ասում է «շան տղերք» , բայց նրանք իրավունք չունեն պատասխանելո։ Այստեղ ժողովրդավարության մասին խոսելն ուշացած է»,- ամփոփեց մեր զրուցակիցը։
Հիշեցնենք, որ երեկ «Դալմա մոլ»-ի ավտոկայանատեղիում հանրային գործիչ Միհրան Հակոբյանի վրա տեղի էր ունեցել բանդիտական հարձակում։ Դիմակավորված անձինք թիկունքից հարձակվել էին վերջինիս վրա, ծեծի ենթարկել և փախուստի դիմել։ Նախկին պատգամավորը մարմնական վնասվածքներով տեղափոխվել էր «Իզմիրլյան» ԲԿ։
