Հռոմի Պապ Ֆրանցիսկոսը Կանանց միջազգային օրվա նախօրեին մատնանշել է կանանց հարգելու եւ փայփայելու անհրաժեշտությունը: Կիրակի նա քարոզով ելույթ է ունեցել Իրաքի Բաղդիդա (Կարակոշ) քաղաքում, որը համարվում է քրիստոնեության տեղի կենտրոնը, հաղորդում է ՏԱՍՍ-ը:
«Ցանկանում եմ շնորհակալություն հայտնել այս երկրի բոլոր մայրերին եւ կանանց՝ համարձակ կանանց, որոնք շարունակում են կյանք տալ՝ չնայած բոլոր վերքերին: Կանանց պետք է հարգել եւ փայփայել: Մեզ անհրաժեշտ է ուշադրություն հատկացնել եւ հնարավորություններ տրամադրել նրանց»,-ասել է հովվապետը: Ընդ որում՝ նա հիշատակել է Աստվածածնի դերի մասին, որը «պաշտպանում է ի վերուստ»:
Ֆրանցիսկոսը դարձել է Հռոմեական կաթոլիկ եկեղեցու առաջին ղեկավարը, որն այցելել է Իրաք: Ավելի վաղ Մոսուլ քաղաքի հրապարակում, որտեղ տեղակայված է «Իսլամական պետություն» խմբավորման ահաբեկիչների պատճառած վնասի հետեւանքով լուրջ տուժած չորս եկեղեցի, նա աղոթել է պատերազմների եւ ահաբեկչության բոլոր զոհերի համար:
