Ռուս-վրացական սահմանին լարված իրավիճակ է, հազարավոր մարդիկ Ռուսաստանում մասնակի զորահավաք հայտարարելուց հետո շտապում են լքել երկիրը։ Սահմաններին առաջացել են հերթեր։
Ռուսաստանի Անվտանգության Դաշնային ծառայությունը (ԱԴԾ) Վերին Լարսի սահմանային հսկիչ անցագրային կետում զրահափոխադրիչ է տեղակայել, որպեսզի սահմանն անօրինական հատելու զինապարտների փորձերը կանխվեն. հաղորդում է ՌԲԿ-ն։
ԱԴԾ-ն պարզաբանում է․ ռազմամեքենայի առկայությունը չի նշանակում, որ այդտեղ նոր զինվորական արգելափակող հենակետ է ստեղծվելու։ Անվտանգության Դաշնային ծառայությունում նաև հավատացրել են, որ զորակոչի տարիքի տղամարդկանց ելքը դեռ չի սահմանափակվել Վերին Լարսի անցակետում, և, որ համապատասխան միջոցառումները նախաձեռնվել են անկանխատեսելի դեպքերի համար։
Հյուսիսային Կովկասի լրատվականներն էլ իրենց հերթին հաղորդում են, որ դեռևս սեպտեմբերի 24-ին ռուս-վրացական սահմանին՝ ռուսական կողմից դեպի Վրաստան, մոտ երեք հազար մեքենա կար, սակայն թիվը գնալով մեծանում է։
Ավելի վաղ Ռուսաստանում հայտարարվել էր մասնակի զորահավաքի մասին, որը կներգրավի նախկինում զինվորական ծառայություն անցած, կոնկրետ մասնագիտություններ ու ռազմական հմտություններ ունեցող ավելի քան 300 հազար անձանց։
Նարինե Կիրակոսյան
