2024 թվականի դեկտեմբերի 25-ին Ղազախստանի Ակտաու քաղաքի մոտ «Ադրբեջանական ավիաուղիներ» ավիաընկերությանը պատկանող ուղևորատար ինքնաթիռի կործանման կապակցությամբ մի շարք լրատվամիջոցներում, ինչպես նաև Telegram սոցիալական ցանցում տարածվում է կեղծ տեղեկատվություն ապահովագրական գումարների չվճարման մասին։ Ադրբեջանական ավիաընկերությանը վճարվել է 1,003 միլիարդ ռուբլու չափով ապահովագրական փոխհատուցում՝ ինքնաթիռի ամբողջական ապահովագրական արժեքի համար. ասվում է Ռուսաստանի արտաքին գործերի նախարարության հայտարարության մեջ։
Թռիչքի 62 ուղևորներից 46-ի վնասվածքների և մահվան հետ կապված պահանջները լիովին կարգավորվել են, այդ թվում՝ Ռուսաստանի 15 քաղաքացիներից 7-ի, Ադրբեջանի 38 քաղաքացիներից 35-ի, Ղրղզստանի բոլոր 3 քաղաքացիների և Ղազախստանի 6 քաղաքացիներից 1-ի համար կատարվել են ամբողջական վճարումներ: Ինքնաթիռի վիրավորված ուղևորներին և մահացածների հարազատներին կատարվել են ապահովագրական վճարումներ՝ ընդհանուր առմամբ 358,4 միլիոն ռուբլու չափով: Շարունակվում են աշխատանքները վիրավորների և մահացածների հարազատների հետ՝ ամբողջական փոխհատուցման շուրջ համաձայնեցման ուղղությամբ:
Հիշեցնենք, որ դեկտեմբերի 25-ին Ղազախստանի Ակտաու քաղաքի մոտակայքում վթարի է ենթարկվել «Ադրբեջանական ավիաուղիներ» ընկերության Բաքու-Գրոզնի չվերթը կատարող Embraer ուղևորատար ինքնաթիռը։ Ինքնաթիռում եղել է 67 մարդ, այդ թվում՝ անձնակազմի 5 անդամ։ Վթարի հետևանքով զոհվել է 38 մարդ, այդ թվում՝ Ադրբեջանի, Ռուսաստանի և Ղազախստանի քաղաքացիներ։
