Թուրքիան լազերային չափագրող սարքեր ու այլ ինժեներական սարքավորումներ է փոխանցել Վրաստանի պաշտպանության նախարարությանը: Այս մասին հայտնում է Վրաստանի պաշտպանության նախարարության մամուլի ծառայությունը:
Սարքավորումները տրամադրվել են որպես դրամաշնորհ: Դրանք կտրամադրվեն Վրաստանի պաշտպանության ուժերի ինժեներական զորքերին:
Թուրքական կողմից սարքավորումների փոխանցման մասին փաստաթուղթը ստորագրել է Թուրքիայի ռազմական կցորդ, գնդապետ Բուրաք Ալթըները, իսկ վրացական կողմից՝ Վրաստանի ՊՆ ռազմավարական պլանավորման վարչության պետ, գնդապետ Իոսիֆ Նիկոլեիշվիլին:
«Այս սարքավորումները կնպաստեն մեր ստորաբաժանումների կողմից առաջադրանքների արդյունավետ կատարմանը: Այս օրը Վրաստանի և Թուրքիայի միջև սերտ ռազմական համագործակցության հերթական ցուցադրումը դարձավ», – ասել է Նիկոլեիշվիլին:
Նախարարությունը նշել է, որ Թուրքիան և Վրաստանը երկար տարիներ սերտ ու հաջող համագործակցում են պաշտպանության ոլորտում:
