Ադրբեջանի նախագահ Իլհամ Ալիևն իշխող «Նոր Ադրբեջան» կուսակցության հիմնադրման 30-ամյակին նվիրված հանդիսավոր միջոցառմանը հայտարարել է, թե իբր Հայաստանը «ցանկանում էր ՀԱՊԿ անդամ երկրներին Ադրբեջանի դեմ հանել»: Այս մասին գրում է Tert.am-ը։
Հայաստանը ՀԱՊԿ-ի միջոցով մտադիր էր «անհիմն» մեղադրանքներ ներկայացնել Ադրբեջանին և, ըստ էության, այդ կազմակերպության անդամ երկրներին «հանել Ադրբեջանի դեմ»,- ասել է Ալիևը։
Նա նշել է, որ ՀԱՊԿ-ի մյուս անդամները «չեն գնացել այս սադրանքին»:
«Այս կազմակերպությունում մենք ավելի շատ ընկերներ ունենք, քան Հայաստանը։ Ինչի՞ հաշվին: Մեր քաղաքականության շնորհիվ։ Ինչո՞ւ է բացասական վերաբերմունք Հայաստանի նկատմամբ, որովհետև նրանք ամեն տեղ «ստում են» ու, ինչպես ասում են, դուռ չի մնացել, որ չթակեն իրենց հարցերը լուծելու համար։ Այս ամենը տեսանելի է, բոլորը տեսնում են և գիտեն»,- ընդգծել է Ալիևը։
