Անկարան քննարկում է թուրքական և հայկական ավիաընկերությունների դիմումները՝ կապված Ստամբուլ-Երևան-Ստամբուլ չվերթերի բացման հետ։ Այս մասին հայտնել է Թուրքիայի արտգործնախարար Մևլութ Չավուշօղլուն ԱՄԷ կատարած այցի արդյունքներով լրագրողների հետ զրույցում։
Նրա խոսքով՝ ավիաընկերությունների հայտերը քննարկում են տրանսպորտի նախարարությունը եւ Թուրքիայի քաղաքացիական ավիացիայի գլխավոր տնօրինությունը։ «Սկզբունքորեն, թուրքական կողմի վերաբերմունքը խնդրին դրական է։ Մոտ օրերս կորոշվի, թե ընկերություններից որ մեկը կկարողանա թռչել այս երթուղով»,- ասել է Չավուշօղլուն։
Նա ընդգծել է, որ Թուրքիան հանդես է գալիս Հարավային Կովկասում խաղաղության, կայունության և տնտեսական զարգացման օգտին։
Չավուշօղլուն հույս է հայտնել, որ հայկական կողմը ջանքեր կգործադրի տարածաշրջանում երկարաժամկետ խաղաղություն ու կայունություն ապահովելու համար։
