Իվերջո, մենք պետք է պարզենք, թե այն, ինչ հնչեցվում է կառավարության կողմից՝ թվեր, վիճակագրություն, կյանքի որակի բարելավում, աշխատատեղերի ստեղծում, տնտեսության աճ, դրանք ինչքանո՞վ են իրատեսական․ այսօր՝ փետրվարի 9-ին, ԱԺ նիստում նշեց «Հայաստան» խմբակցության պատգամավոր Թադևոս Ավետիսյանը:
Նրա խոսքով՝ կառավարության հրապարակած՝ իրար առնչվող մակրոտնտեսական ցուցանիշների միջեւ, մեղմ ասած, կա անհամապատասխանություն:Ըստ Ավետիսյանի՝ մյուս խնդիրն էլ այն է, որ այդ թվերն առաջինը հայտնում է կառավարությունը, այնուհետև պաշտոնական վիճակագրությունը դրանք արտատպում է։ «Մի հատ ճշտեք, եկեք, ասեք, թե ինչպես մինչև պաշտոնական վիճակագրության հրապարակելը վարչապետը, կառավարության անդամները թվերն ասում են, հետո նոր պաշտոնական վիճակագրությունը, որը հիմնական աղբյուրն է, որ պետք է իմանանք, ներկայացնում է դրանք: Այսինքն՝ թելադրում եք, այնտեղ գրո՞ւմ են: Նախկինում այդպիսի բան չի եղել:
Երկրորդ՝ 2021-ին միջին աշխաավարձն աճել է 7.6 %-ով, աշխատողների թիվը միջինը աճել է 4%-ով, եկամտային հարկի դրույքաչափը նվազել է ընդամենը 1 տոկոսային կետով, բայց ամբողջական եկամտահարկի ծավալը ավելացել է ընդամենը 3-3.5%-ով: Սա բացատրության կարիք ունի, մանավանդ, որ աշխատավարձից վճարվող հարկերի առյուծի բաժինը՝ 80%-ը, եկամտահարկն է: Բացատրեք այս անհամապատասխանությունը: Հարյուր անգամ հոդվածներով հարցը բարձրացրել ենք, բայց պատասխան չկա, և կառավարության հաջորդ նիստում նույն բան է կրկնվում»,- հայտարարեց ընդդիմադիր պատգամավորը:
