«Հետք»-ը գրում է․ Սյունիքի մարզպետ Մելիքսեթ Պողոսյանը 2020թ.-ին գնել է պարտատոմս, որի գինը տարեվերջին կազմել է 60 մլն դրամ: Թե կորոնավիրուսի տարածման շրջանում և պատերազմական իրավիճակում ումից է Մ. Պողոսյանը գնել այդ պարտատոմսը և ինչ նպատակով՝ հայտնի չէ: Մարզպետը հայտարարագրում չի նշել գործարքի մյուս մասնակցի տվյալները: Համապատասխան սյունակում գծիկ է դրել, ինչը համակարգն ընդունել է որպես տվյալ և ընդունել է հայտարարագիրը, մինչդեռ այդ դաշտը պետք է պարտադիր լրացվեր:
Նշենք, որ պարտատոմսը պարտքային արժեթուղթ է, որը հավաստում է դրա տիրապետողի իրավունքը՝ նախատեսված ժամկետում պարտատոմս թողարկած անձից ստանալ պարտատոմսի անվանական արժեքը կամ գույքային այլ համարժեք։ Պարտատոմսը դրա տիրապետողին իրավունք է տալիս նաև ստանալ պարտատոմսի անվանական արժեքից տոկոս կամ այլ գույքային իրավունքներ։
Սյունիքի մարզպետ Մելիքսեթ Պողոսյանը Կոռուպցիայի կանխարգելման հանձնաժողով է ներկայացրել 2020թ. գույքի, եկամուտների և շահերի հայտարարագիր: Մ. Պողոսյանը պաշտոնում նշանակվել է 2020թ. դեկտեմբերի 8-ին, սակայն պաշտոնը ստանձնել է դեկտեմբերի 9-ին:
Կոռուպցիայի կանխարգելման հանձնաժողովում նոր-նոր են հրապարակվում պաշտոնյաների տարեկան հայտարարագրերը: 2020թ. հայտարարագրերի ներկայացման վերջնաժամկետը սահմանվել է 2021թ. մայիսի 31-ը:
Ըստ հայտարարագրի՝ Մելիքսեթ Պողոսյանն ունի 7 միավոր անշարժ գույք՝ առանձնատուն, շենք-շինություններ և հողամաս Գորիս համայնքում, ինչպես նաև 2 միավոր հողամաս՝ Տեղ համայնքում:
Մարզպետը հայտարարագրել է նաև 4 ավտոմեքենա՝ TOYOTA, MITSUBISHI, URAL և GAZ մակնիշի: Վերջինը ձեռք է բերել 2020թ.-ին, մյուս ավտոմեքենաները՝ 2013 և 2017 թվականներին:
Ինչ վերաբերում է դրամական միջոցներին, Մ. Պողոսյանը 2020թ. վերջին կանխիկ ունեցել է 20 մլն դրամ, իսկ բանկային հաշիվներում՝ մոտ 1 մլն դրամ:
Որպես եկամուտ հայտարարագրել է Պաշտպանության նախարարությունից ստացած 1 մլն 927 հազար դրամ կենսաթոշակն ու Աշխատանքի և սոցիալական հարցերի նախարարությունից ստացած 1 մլն 72 հազար դրամ աշխատանքի վարձատրություն և/կամ դրան հավասարեցված այլ վճարումները: Մարզպետը չի հայտարարագրել Սյունիքի մարզպետարանից ստացած 2020թ. դեկտեմբեր ամսվա աշխատավարձը:
Պարզաբանում ստանալու նպատակով զանգահարեցինք Սյունիքի մարզպետարան: Ընդունարանի աշխատակցուհին լսեց հարցը, այնուհետև փոխանցեց, որ մարզպետը զբաղված է, չի կարող խոսել:
Մելիքսեթ Պողոսյանի կինը՝ Ալվարդ Պետրոսյանը, համատեղ սեփականության իրավունքով հայտարարագրել է բնակարան Երևան քաղաքի Էրեբունի վարչական շրջանում: Իսկ 2020թ.-ին ձեռք է բերել 2012թ. արտադրության TOYOTA մակնիշի ավտոմեքենա:
Ալվարդ Պետրոսյանը կանխիկ ունեցել է 2 մլն դրամ, իսկ բանկային հաշիվներում՝ 150 հազար դրամ: Մարզպետի կնոջ միակ եկամուտը ստացած կենսաթոշակն է եղել՝ 318 հազար դրամ:
Մելիքսեթ Պողոսյանի որդին՝ Կարեն Պողոսյանը, հայտարարագրել է միանձնյա սեփականության իրավունքով պատկանող 10 միավոր անշարժ գույք՝ Գորիս համայնքում: Նշված բոլոր գույքերը հասարակական նշանակության շինություններ են, որոնք, բացի մեկից, գնել է: Հասարակական նշանակության շինություններից մեկը ժառանգություն է:
Պարզվում է 2020թ.-ն գույք ձեռք բերելու համար բարենպաստ է եղել մարզպետի ընտանիքի անդամների համար: Կարեն Պողոսյանը նշված տարում գնել է 2 ավտոմեքենա՝ OPEL և TOYOTA մակնիշների:
Մարզպետի որդին իր բանկային հաշիվներում գումար չի ունեցել, իսկ որպես կանխիկ գումար հայտարարագրել է 30 մլն դրամ: Տարեկան եկամուտը կազմել է մոտ 30 մլն 547 հազար դրամ, որից 30 մլն-ը հայտարարագրել է «այլ եկամուտ», իսկ 547 հազարը՝ «Մելիք Բարխուդար» ՍՊԸ-ից ստացած աշխատավարձ:
Նշենք, որ «Մելիք Բարխուդար» ՍՊԸ-ն, ըստ պետռեգիստրի տվյալների, հիմնադրվել է 2003թ.-ին: Ընկերությունը հանդիսանում է Հայաստանի սպառողական կոոպերատիվների միության Գորիսի հանրախանութի և Գորիսի շուկայի իրավահաջորդը:
2010թ.-ից ընկերության միակ բաժնետերը մարզպետի որդին է՝ Կարեն Պողոսյանը: Վերջինս նաև ընկերության տնօրենն է: «Մելիք Բարխուդար» ՍՊԸ-ի կանոնադրական կապիտալը կազմում է 11 մլն դրամ:
Հարկային մարմնի տեղեկատվական շտեմարանի տվյալների համաձայն՝ «Մելիք Բարխուդար» ՍՊԸ-ն իրականացնում է անշարժ գույքի վարձակալության հետ կապված գործունեություն:
Կարեն Պողոսյանի կինը՝ Լիլիա Մկրտչյանը, «Մելիք Բարխուդար» ՍՊԸ-ում գանձապահ է աշխատում, որտեղից էլ 2020թ.-ին ստացել է 372 հազար դրամ եկամուտ: 1 մլն դրամ էլ «այլ եկամուտ» ստացել է Աշխատանքի և սոցիալական հարցերի նախարարությունից:
Հայտարարագրի համաձայն՝ մարզպետի հարսը կանխիկ ունեցել է 3 մլն դրամ, անկանխիկ՝ 106 հազար դրամ: Փոխարենը հայտարարագրել է հանձնած ավանդներ, որը տարվա վերջին կազմել է 69 մլն 398 հազար դրամ:
