Այսօր մենք ոգեկոչում ենք Մարտի 1-ի զոհերի հիշատակը՝ նրանց կյանքը, կիսատված ճանապարհը և այն խոր ցավը, որը հետք է թողել մեր հասարակության վրա։
Միաժամանակ հստակ և աներկբա հայտարարում ենք՝ նման ողբերգությունները մեր երկրում այլևս երբեք չպետք է կրկնվեն։ Պետությունը պարտավոր է կանգնել յուրաքանչյուր քաղաքացու կողքին, պաշտպանել նրա կյանքն ու արժանապատվությունը, և որևէ քաղաքական շահագրգռվածություն չի կարող խոչընդոտել այն:
Ողբերգությունից գրեթե երկու տասնամյակ անց դեպքի բոլոր հանգամանքները դեռևս չեն բացահայտվել։
Չնայած գործող իշխանությունների արդեն 8 տարի հնչող հայտարարություններին, թե Մարտի 1-ը «բացահայտված է», արդարությունը չի վերականգնվել, իսկ նրանց անպատասխանատու աշխատանքի հետևանքով հասարակության անվստահությունը պետական ինստիտուտների նկատմամբ միայն խորացել է։
Այս անորոշությունն ու անպատժելիությունը խարխլում են քաղաքացիների վստահությունը պետական ինստիտուտների հանդեպ և սպառնում պետական վստահությանն ամբողջությամբ։
Այն գործողությունները, որոնք արժեցել են մարդկային կյանքեր, պետք է ստանան ամբողջական իրավական և քաղաքական գնահատական, իսկ պատասխանատուները՝ պատժվեն, ոչ թե մնան կիսաբացահայտումների և կիսաճշմարտությունների ստվերում։
Մեսրոպ Առաքելյան, «Ապրելու երկիր» կուսակցության համահիմնադիր
