«Գնաճը գլոբալ երևույթ է, և Հայաստանը, շատ երկրների հետ համեմատած, ունի գնաճի շատ ավելի ցածր մակարդակ: Գնաճի դեմ պետք է պայքարեն եկամուտների ու աշխատավարձերի աճով: 2018-ի մայիսից ի վեր ՀՀ-ում ստեղծվել է 143 հազար նոր աշխատատեղ: Ընդ որում, 2022-ի սեպտեմբերի տվյալներով՝ 73 տոկոսով աճել է աշխատավարձի ֆոնդը, և 46,1 տոկոսով աճել է միջին աշխատավարձը»,-ԱԺ-ում Կառավարության հետ հարցուպատասխանի ժամանակ ասաց վարչապետ Նիկոլ Փաշինյանը։
Նա խոսեց նաև պաշտպանության ոլորտի ծախսերից՝ նշելով, որ 2023-ի բյուջեի հարկային եկամուտի մասը պլանավորում են 2 տրլն 204 մլրդ դրամ, որը 2018-ի ցուցանիշից ավելի է 946 մլրդ դրամով կամ 75,1 տոկոսով:
«Այսինքն՝ հեղափոխությունից 4,5 տարի անց, անցած լինելով պատերազմի ու քովիդի միջով, առաջարկում ենք բյուջե, որը 2018-ի բյուջեից ավելի է 75 տոկոսով:Պաշտպանության ոլորտի ծախսերը նախատեսված են 509 մլրդ դրամ, աճը 2018-ի նկատմամբ 113 տոկոս է, այսինքն՝ կրկնապատիկից ավելի: Իսկ 2022-ի նկատմամբ աճը կազմել է 47 տոկոս: Այս թվերի հետեւում գոյություն ունեցող բովանդակությունը նույնքան կարեւոր է: Ուզում եմ ուրախությամբ ընդգծել, որ մեկնարկում է կամավոր ատեստավորման միջոցով զինծառայողների աշխատավարձերի առնվազն կրկնապատկումը: Մենք դեպքեր կունենանք, որ նույնիսկ եռապատիկ ավելացում կլինի: Մենք անցում ենք կատարում պրոֆեսիոնալ բանակի: Այն մարդիկ, ովքեր կընտրեն ռազմական մասնագիտությունը եւ ավարտելով ռազմաուսումնական հաստատությունը՝ կստանան նշանակում, այդ պահին կստանան բնակարան, որը կլինի իրենց սեփականությունը: Այն տնօրինելու իրավունք կստանան ծառայությունն ավարտելուց հետո»,-տեղեկացրեց Փաշինյանը։
