Այսօր մենք դաշինք ենք ձևավորում՝ ըստ Yerkir.am-ի ասաց ՀՀ երկրորդ նախագահ Ռոբերտ Քոչարյանը «Հայաստան» դաշինքի ձևավորման միջոցառմանը, որը կազմվեց ՀՀ երկրորդ նախագահ Ռոբերտ Քոչարյանի, Հայ Հեղափոխական Դաշնակցության և «Վերածնվող Հայաստան» կուսակցության միջև։
Նա նշեց, որ երկիրը կանգնած է ծայրահեղ մարտահրավերների առջև, և այդ մարտահրավերները հիմնականում անվտանգության սպառնալիքների հետ են կապված։
Երկիրը, նրա խոսքով, ունի կառավարման և տնտեսական ճգնաժամ։ Երկրում ակնհայտ է նաև ինքնության ճգնաժամը։
Եվ պետք են ուժեր ու մարդիկ, որ բավարար չափի փորձ ունեն այսպիսի մարտահրավերներ հաղթահարելու համար։
«Ինչո՞ւ ես․ ունեմ մեծ կառավարման փորձ ճգնաժամային իրավիճակներում, ունեմ կուտակած փորձ և գիտելիքներ անվտանգության, պաշտպանության համակարգում, ունեմ փորձ տնտեսական ճգնաժամ հաղթահարելու հարցում։ Ներկա վտանգները և կուտակած փորձն ու գիտելիքները գրեթե համընկնում են»,-ասաց Ռոբերտ Քոչարյանը։
Ինչո՞ւ Դաշնակցությունը՝ հարցին նա պատասխանեց․ որովհետև ՀՅԴ-ն այն կուսակցությունն է, որն աշխարհով մեկ պայքարել է և պայքարում է հայերի ինքնությունը պահպանելու համար։
«Սա նաև այն կուսակցությունն է, որի հետ ունեմ երկարատև համագործակցության փորձ։ Դաշնակցությունը եղել է Կառավարության անդամ իմ նախագահության տարիներին նույնիսկ երբ կոալիցիա դեռ ձևավորված չէր։ Փորձը արդյունավետ է, արդյունքները կան և բոլորդ այդ արդյունքների ականատեսն եք եղել»,-ասաց նա։
Ինչո՞ւ «Վերածնվող Հայաստան» կուսակցությունը՝ հարցին, Ռոբետ Քոչարյանը պատասխանեց․ այն ծնվել է Սյունիքում և հիմա տարածվում է Հայաստանով մեկ, և Սյունիքը ներկա սպառնալիքների էպիկենտրոնն է Հայաստանի համար` Սյունքից է կախված՝ մենք մնալո՞ւ ենք որպես գործոն այս տարածաշրջանում, թե՞ դառնալու ենք կցորդ այս տարածաշրջանում։
«Այստեղ վտանգները լուրջ են և, կարծում եմ, Սյունիքն այսօր մեր այս պահի պայքարի սիմվոլն է հանդիսանում»,-ասաց նա։
Այս իշխանությունը, նրա խոսքով, մեր պարտության խորհրդանիշն է, այդ պատճառով էլ պետք է հեռանա։
Մանրամասն՝ տեսանյութում․ https://www.youtube.com/embed/bmkstHLJIVU
