Դատական ակտերում գրված է, որ անձինք ունեն հեղինակություն և կարող են իրենց հեղինակությունն օգտագործելով, ինչ-որ կերպ խոչընդոտել գործի քննությանը։ Լրագրողների հետ զրույցի ժամանակ ասաց Ռազմական ավիացիայի նախկին պետ Ավետիք Մուրադյանի փաստաբան Երեմ Սարգսյանը։
Փաստաբանը նկատում է՝ անպիտան հրթիռների գործով որպես մեղադրյալ ներգրավված անձանց հեղինակությունը միայն բացասական առումով է օգտագործվում։
«Որևէ մեկը չի ասում, որ անձն ունի հեղինակություն, և այդ հեղինակությունից ելնելով, որևէ ոչ պատշաճ վարքագիծ չի դրսևորի։ Այսինքն եթե հեղինակություն ունես, ուրեմն դա կալանքի հի՞մք պետք է լինի։ Եկեք բոլորս հեղինակազրկվենք, որ հանկարծ կալանքի հիմք չլինի։ Սա աբսուրդ է»,-ասաց Երեմ Սարգսյանը։
Նշենք, որ այսօր ընթանում էր անպիտան հրթիռների գործով նիստը, որի շրջանակներում որպես մեղադրյալ ներգրավվել են Պաշտպանության նախկին նախարար Դավիթ Տոնոյանը, ԳՇ պետ Արտակ Դավթյանը, Ռազմական ավիացիայի նախկին պետ Ավետիք Մուրադյանը, Դավիթ Գալստյանը և ևս երեք անձ։
Աղբյուր` Փաստինֆո
