ՀՀ նախկին պաշտպանության նախարար, ԱԺ «Հայաստան» խմբակցության ղեկավար Սեյրան Օհանյանը պահանջում է, որ վարչապետ Նիկոլ Փաշինյանը պատասխան տա, թե որտեղ է իրենց գնած ռազմական տեխնիկան։ Նա այդ մասին խոսեց Եռաբլուրում` անդրադառնալով Փաշինյանի այն հայտարարությանը, թե Արարատի ու պատմական Հայաստանի խոսույթի ներքո ՀՀ–ին հազիվ ժանգոտած, ոչ պիտանի զենք վաճառեն։
«Մենք երբևէ ժանգոտած զենք չենք գնել, չենք ունեցել այնպիսի սպառազինություն, որն անպիտան է եղել մարտի դաշտում։ Ընդհակառակը` տարիներ շարունակ ռազմատեխնիկական համագործակցության շրջանակներում ոչ միայն գնել ենք ռազմական տեխնիկա, մենք այն ձեռք ենք բերել ՀԱՊԿ–ից` ցածր գներով, ինչպես նաև մեր ռազմավարական գործընկերոջից ենք ստացել բավականին մեծ քանակությամբ առաջատար սպառազինություն։ Փաշինյանը թող ինքը պատասխան տա, թե ուր է այն սպառազինությունն ու ռազմական տեխնիկան, որ եղել է հայկական բանակի ձեռքում, ինչու ինքը չկարողացավ արագ տիրապետել կառավարման հիմունքներին, երբ ասում էր, որ որևէ մեկս չկասկածենք, թե ինքը կարող է գերագույն հրամանատար լինել»,– նշեց Օհանյանը։
