«Կտրիճ Ներսիսյանի ամենասիրելի հայրերից մեկը՝ Հայր Ասողիկը դիմել է մտավորականներին՝ կոչ անելով գալ և փրկել կաթողիկոսի աթոռին նստած մարդուն:
Ինչպես միշտ գործող եկեղեցականները հերթական անգամ տիեզերական ԿԵՂԾԻՔԻ մասնակից են ուզում դարձնել մտավորականությանը: Եվ սա ահավոր է: Իրենք հրաժարվում են պատասխանել հարցին՝ Կտրիճ Ներսիսյանը ունի՞ երեխա/երեխաներ, թե՞ ոչ, բայց մյուսներին կոչ են անում՝ եկե՛ք միասին պաշտպանենք կեղծիքը:
Սա հերթական աղետն է»,-ֆեյսբուքյան էջում գրել է Փաշինյանի աշխատակազմի ղեկավար Աարայիկ Հարությունյանը։
Նա, անշուշտ, նկատի է ունեցել Մայր Աթոռի թանգարանների և արխիվի տնօրեն Հայր Ասողիկ աբեղա Կարապետյանի հետևյալ կոչը. «Այս աղետաբեր իրականության մեջ բացառիկ անելիք ունեն մեր մտավորականները՝ բարձր եւ խոնարհ: Ո՞ւր եք Դուք: Որտե՞ղ է Ձեր կենդանի պատը՝ ողջախոհ, հաշտարար, փրկարար:
Ազգային պետությունն ու Ազգային Եկեղեցին են վտանգված, իսկ Դուք լռո՞ւմ եք: Թե նորեն հերթական իշխանությանն եք հաճոյանում՝ անսկզբունք կրկնելով անհեթեթ մտքեր, հարցեր ու խոսքեր, ինչպես օրինակ՝ կոմպոզիտոր Ռոբերտ Ամիրխանյանը…
Արթնացեք, ձայն հանեք, երեւան եկեք եւ ջանքեր գործադրեցեք կանխելու նոր արհավիրքները: Նաեւ, առավել եւս նաեւ Ձեր անսկզբունքայնության եւ անգործության պատճառով է, որ տարիներ շարունակ կորուստներ ու ողբերգություններ ունեցավ Հայաստանն ու մեր ազգը…
Ողջախոհություն ունեցեք եւ օրինակ վերցրեք բարձր Մտավորական պետական գործչից՝ ՀՀ առաջին Նախագահից, ով իմաստությունն ունեցավ ի դեմս Տ. Տ. Վազգեն Ա. Հայրապետի հերոսացնելու Հայոց Եկեղեցին, իսկ այսօր աջակից ու զորակից լինելու Հերոս Եկեղեցու գահակալին եւ Տ. Տ. Վազգեն Ա. Հայրապետի արժանահաջոդին՝ առաքինազարդ Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսին:
Այս նկարագիրն ու կեցվածքը հարկավոր է ազգին, պետությանն ու իշխանություններին, քանի որ Դուք՝ մտավորականներդ եք կոչված կերտելու մերազնյա ԱՐՇԱԼՈՒՅՍԸ»:
Հայր Ասողիկը պատասխանել է Արայիկ Հարությունյանին.
Հարգարժան Տիար Արայիկ Հարությունյան
Սրտի ցավով կարդացի Ձեր գրառումը: Առհասարակ չեմ արձագանքում որեւէ նման գրվածքների, բայց, որովհետեւ անձնապես ճանաչում եմ Ձեզ, միասին մի պատվական Խորհրդի մաս ենք կազմում, ավելին՝ անկեղծ հարգանք ունեմ Ձեր անձի նկատմամբ, ուստի հարկ համարեցի արձագանքել Ձեր գրառմանը:
Սուրբ Եկեղեցում առհավետ միմիայն ՃՇՄԱՐՏՈՒԹՅՈՒՆՆ Է: Եվ մենք՝ բազմամեղ հոգեւորականներս, միմիայն ՃՇՄԱՐՏՈՒԹՅԱՆ կրողներ ենք եւ քարոզողներ: Եվ մենք, հոգեւորականներս, մեր Ճեմարանական բարձրագույն կրթությամբ եւ Ավետարանական բարոյագիտությամբ՝ գիտենք պատվել եւ արժանին մատուցել պետական պաշտոնյային՝ մեր հարազատ Երկրի իշխանավորին (որքան էլ լինենք դժգոհ, տարակարծիք): Եվ ա՛յս ենք տեսել ու սովորել մեր բոլոր Հայրապետներից, մանավանդ, ներկայիս Ն.Ս.Օ.Տ.Տ. Գարեգին Բ. Ամենայն Հայոց Վեհափառ Հայրապետից, ով իմ հոգեւոր Հայրն է, իմ Ուսուցիչը, իմ Հովվապետը:
Մեծ ցավ է, իրապես, որ Դուք՝ լինելով կրթված անձ, պետական այր, Ձեզ թույլ եք տալիս նման անհեթեթ խոսքեր, այդպես անբարեկիրթ վերաբերմունք Ամենայն Հայոց Հայրապետի հանդեպ: Վատ է, ահավոր վատ է, որ Դուք եւս բռնեցիք այդ դատապարտելի ուղին…
Մնում եմ սիրով աղոթարար, հուսալով, որ ի վերջո Ձեր եւ Ձեր գաղափարակիցների հոգում կծագի ՃՇՄԱՐՏՈՒԹՅԱՆ եւ ԱՐԴԱՐՈՒԹՅԱՆ ԼՈՒՅՍԸ՝ տեսնելու եւ գիտակցելու այն աղետը, որը հունցվում է մեր Երկրում: Մինչդեռ մենք միասին կարող էինք կանգնեցնել այս աղետը: Տակավին ի զորու ենք, ԵՂԻՑԻ ԿԱՄՔ:
Հարգանոք եւ աղոթքով՝
Ասողիկ աբեղա Կարապետյան
Մայր Աթոռ Սուրբ Էջմիածնի միաբան
Մաշտոցյան Մատենադարանի
Հոգաբարձուների խորհրդի անդամ
