Հայաստանը բարձր է գնահատում Ուրուգվայի սկզբունքային դիրքորոշումն Արցախի դեմ ադրբեջանաթուրքական ագրեսիայի առնչությամբ: Այս մասին հայտարարել է Հայաստանի արտգործնախարարի պաշտոնակատար Արմեն Գրիգորյանը Ուրուգվայի ԱԳ նախարար Ֆրանսիսկո Բուստիժոյի հետ ճեպազրույցի ժամանակ:
«Հարգելի՛ գործընկերներ,
Պատիվ ունեմ հյուրընկալելու Ուրուգվայի իմ գործընկերոջը՝ արտաքին գործերի նախարար Ֆրանսիսկո Բուստիժոյին, որը գտնվում է Հայաստանում պաշտոնական այցով։ Այս այցը վերահաստատում է հայ-ուրուգվայական ջերմ հարաբերությունները եւ բարեկամական ամուր կապերը: Հաջորդ տարի Հայաստանը եւ Ուրուգվայը նշելու են դիվանագիտական հարաբերությունների հաստատման 30-ամյակը։ Այդ համատեքստում մենք այսօր բովանդակալից զրույց ունեցանք անցյալի ձեռքբերումների, ներկա հնարավորությունների ու ապագա հեռանկարների մասին:
Իհարկե, բարեկամ Ուրուգվայի հետ մեր ավանդական համագործակցությունը, հայ եւ ուրուգվայցի ժողովուրդների կապերն առավել ընդգրկուն պատմություն ունեն։ Մենք հիշում ենք, որ Ուրուգվայն առաջին պետությունն էր, որը 1965թ․ պաշտոնապես ճանաչեց Հայոց ցեղասպանությունը, ինչով վերահաստատեց համամարդկային արժեքների եւ մարդու հիմնարար իրավունքների ջատագովի իր համբավը:
Գիտեք նաեւ, որ Ցեղասպանությունից փրկված բազմաթիվ հայեր ապաստան են գտել Ուրուգվայի հյուրընկալ հողում։ Իսկ ուրուգվայահայ համայնքը, որը մշտապես եղել է Ուրուգվայի պետության հոգածության ներքո, իր ավանդն է բերում այդ երկրի զարգացման գործում՝ մեր երկրների հարաբերություններում կատարելով նաեւ յուրօրինակ կամրջի դեր։
Հայաստանը մեծապես գնահատում է 2020 թվականի աշնանը Արցախի դեմ ադրբեջանաթուրքական ագրեսիայի առնչությամբ Ուրուգվայի սկզբունքային դիրքորոշումը։ Ի թիվս այլոց, երկրի օրենսդիր մարմինը դատապարտել է ղարաբաղյան հակամարտությունում Թուրքիայի կողմից վարձկանների ներգրավումը եւ Ադրբեջանի կողմից մարդու իրավունքների խախտման եւ քաղաքացիական ենթակառուցվածքների ռմբակոծման դեպքերը։
Այս ամենը հաստատում է, որ չնայած Հայաստանը եւ Ուրուգվայը աշխարհագրորեն հեռու են, սակայն հայերի եւ ուրուգվայցիների միջեւ շարունակաբար ամրապնդվող արժեքային եւ աշխարհընկալման կապը հնարավորություն է տալիս հաղթահարելու մեզ բաժանող հազարավոր կիլոմետրերի հեռավորությունը:
Հարգելի՛ գործընկերներ,
Ցավոք, Արցախի ժողովրդի ինքնորոշման եւ գոյության իրավունքի դեմ սանձազերծված պատերազմի հետեւանքները դեռեւս ամբողջովին չեն հաղթահարվել։ Հայաստանը եւ Արցախը բախվում են անվտանգային խնդիրների, դեռեւս չեն հայրենադարձվել հայ ռազմագերիները եւ քաղաքացիական պատանդները։ Այս պարագայում մենք շարունակում ենք ապավինել մեր բարեկամ երկրների եւ, իհարկե, Ուրուգվայի համերաշխության վրա։
Այսօրվա մեր հանդիպման ժամանակ գոհունակությամբ արձանագրեցինք, որ հայ-ուրուգվայական հարաբերությունները դինամիկ զարգանում են։ Հաճախակի են փոխայցելությունները, տարբեր մակարդակի շփումները՝ ինչպես երկկողմ, այնպես էլ բազմակողմ ձեւաչափերում։ Սերտորեն համագործակցում ենք միջազգային կառույցների շրջանակներում, եւ մեր տեսակետները համաշխարհային օրակարգի կարեւոր հարցերի շուրջ հիմնականում համընկնում են։
Միջխորհրդարանական կապերն ավանդաբար ակտիվ են եղել եւ մեծ տեղ են զբաղեցրել մեր հարաբերություններում: Զրույցի ընթացքում կարեւորեցինք երկու երկրների խորհրդարաններում բարեկամական խմբերի գործունեությունը:
Մենք համակարծիք ենք, որ տնտեսական ոլորտում առկա է չիրացված մեծ ներուժ եւ պատրաստակամ ենք ձեռնարկելու գործնական քայլեր՝ հետաքրքրություն ներկայացնող ոլորտներում համագործակցությունը խթանելու համար: Հատկապես կառանձնացնեի տեղեկատվական տեխնոլոգիաների, բանկային գործի, ջրային ռեսուրսների կառավարման եւ վերականգնվող էներգիայի ոլորտները: Այս առումով նշեմ, որ պարոն Բուստիժոն ունենալու է մի շարք հանդիպումներ, որոնց ընթացքում առարկայական կքննարկվեն տնտեսական փոխգործակցության զարգացման հարցերը։
Կցանկանայի ընդգծել նաեւ, որ մեր երկրների միջեւ գործում է մուտքի՝ առանց վիզաների ռեժիմ, որը լրացուցիչ գործիք է գործարարների շփումների ակտիվացման եւ զբոսաշրջային այցերի քանակի մեծացման համար:
Ամփոփելով խոսքս՝ կցանկանայի եւս մեկ անգամ ողջունել պարոն Բուստիժոյին եւ խոսքը փոխանցել նրան:
Շնորհակալություն»:
