Հեռաբժշկության տեխնոլոգիաները հասան Ծավ գյուղ

Ապրիլի 12-ին Ծավ գյուղում բացվեց VIVA հիմնադրամի առաջին հեռաբժշկության կետը։

Այս առիթով կազմակերպվել էր տոնական համերգ, որը համախմբեց Սյունիքի այս սահմանամերձ գյուղի բնակիչներին։ Այժմ Ծավի և հարակից համայնքների բնակիչները ևս հնարավորություն կունենան ստանալ որակյալ բժշկական օգնություն։ Հեռաբժշկության տեխնոլոգիաները թույլ կտան արդյունավետ փոխհարաբերություններ ստեղծել բժշկի և բուժառուի միջև՝ ապահովելով բուժօգնության մատչելիություն նույնիսկ ամենահեռու բնակավայրերում։ Սահմանամերձ բնակչության աջակցության ծրագիրը մեկնարկել է 2023 թվականի հոկտեմբերին։ Մեկուկես տարվա ընթացքում VIVA հիմնադրամի բժիշկների և կամավորների շարժական խումբը այցելել է հարյուրավոր գյուղեր՝ իր գործունեությամբ ընդգրկելով ողջ Հայաստանը։

Ծրագրի շրջանակում նախատեսվում է սահմանամերձ շրջաններում բացել հեռաբժշկության յոթ կենտրոն՝ հագեցած առցանց խորհրդատվության, ախտորոշման և առողջության մոնիտորինգի սարքավորումներով։ Սա հնարավորություն կտա բնակիչներին ստանալ մասնագիտական բժշկական խորհրդատվություն և հեռահար ձևով՝ տեսազանգի միջոցով, այցելել բժիշկներին՝ առանց երկար ճանապարհներ անցնելու։

Միաժամանակ հեռաբժշկության կենտրոններ կսկսեն գործել Սյունիքի Նորաշենիկ, Խնձորեսկ և Տեղ գյուղերում։ Այնուհետև, ծրագրի երկրորդ փուլում, այն կընդգրկի նոր մարզեր՝ հեռաբժշկության կետեր կբացվեն Գեղարքունիքի Բարձրավան, Տավուշի Հալիձոր և Վայոց ձորի Խաչիկ գյուղերում։ Հեռաբժշկության ծրագիրը նախատեսում է արդեն առաջին ամիսներին հասնել հազարավոր հիվանդների՝ հնարավորություն տալով նրանց ստանալ այնպիսի բժշկական խորհրդատվություն, որը նախկինում՝ տարածական հեռավորության և բժշկական ռեսուրսների բացակայության պատճառով, անհասանելի էր։

Ծրագրի բոլոր փուլերում բոլոր ծառայությունները, այդ թվում՝ դեղորայքը, բուժառուներին տրամադրվում են անվճար և ամբողջությամբ ֆինանսավորվում են հիմնադրամի կողմից։