Փաստաբան Կարապետ Պողոսյանը գրում է. «Սամվել Կարապետյանը իր խոսքում ասել էր՝ մենք էլ մեր ձևով ենք մասնակցելու, սակայն Փաշինյանը «մասնակցություն» բառը շատ մանիպուլատիվ ձևով փոխեց «միջամտության» և այն օգտագործեց պետության դեմ որպես հանցանք որակելով։ Ի դեպ, շատ լրատվականներ հենց Փաշինյանի շրջանառած բառը կիրառեցին։ Իսկ իրականում մասնակցել և միջամտել բառերը տարբեր են թե՛ իրենց իմաստով և թե՛ կատարվելիք արարքի բնույթով։
Հետևաբար, երկրի կառավարիչը ինչպես միշտ «փայլեց» իր մարդկանց գլխին սարքելու, փակելու տաղանդով։
Այժմ ինքը ձգտելու է այլ բանի՝ կարողանա նախկին հաջողված փորձը կիրառելով՝ հասնել նրան, որ Կարապետյանների ընտանիքը ստիպված լինի մտնել քաղաքականություն, պատրաստվի հերթական ընտրությունների և գնա «կրելու»։ Ինչը հիանալի նվեր կլինի Փաշինյանի և մեծ ողբերգություն՝ բոլորիս համար։
Սակայն կարծում եմ՝ Կարապետյանների ընտանիքը կդրսևորի լուրջ խոհեմություն, չի տրվի գայթակղությանը, իր ներուժը և կապերը կներդնի Հայաստանում այս պահին միակ և իրատեսական օրակարգին` իմպիչմենտին։
Յուրաքանչյուր վայրկյանը սրանց լինելու մեծ վտանգ է բոլորիս համար, ինչը այլևս շատ շատերը զգացել են սեփական մաշկի վրա»։
