Աննա Վարդապետյանի պաշտոնավարման 14 օրվա ընթացքում՝ աշխատանքից ազատվելու հերթական դիմումը Դատախազությունում

50

ՀՀ գլխավոր դատախազության պետական իշխանության դեմ ուղղված հանցագործությունների գործերով վարչության պետ, արդարադատության երրորդ դասի պետական խորհրդական Վաղինակ Ջանազյանն աշխատանքից ազատվելու դիմում է գրել։ Հայտնում են Գլխավոր դատախազությունից։

Հիմք ընդունելով Վաղինակ Ջանազյանի՝ աշխատանքից ավատվելու վերաբերյալ դիմումը, գլխավոր դատախազ Աննա Վարդապետյանը ստորագրել է հրաման՝ Վաղինակ Ջանազյանին հոկտեմբերի 3–ից աշխատանքից ազատելու վերաբերյալ։

Վաղինակ Ջանազյանը ՀՀ քննչական կոմիտեի հատկապես կարևոր գործերի քննության գլխավոր վարչության պետի տեղակալ է եղել, այնուհետև ավագ դատախազ, Երևան քաղաքի Կենտրոն և Նորք-Մարաշ վարչական շրջանների դատախազության դատախազ, իսկ 2021–ից Պետական իշխանության դեմ ուղղված հանցագործությունների գործերով վարչության պետ։

Նշենք, որ սեպտեմբերի 15-ից՝ Աննա Վարդապետյանի՝ Գլխավոր դատախազի պաշտոնում աշխատելուց ի վեր սեփական դիմումի համաձայն աշխատանքից ազատվել են նրա 3 տեղակալները՝ Վահե Հարությունյանը, Արմեն Աֆանդյանը և Հայկ Ասլանյանը։