Ռուսաստանի Գերագույն դատարանը կասեցրել է Ռուսաստանում «Թալիբան» շարժման գործունեության արգելքը. Դրա համար միջնորդել է գլխավոր դատախազությունը։ Ավելի քան 20 տարի «Թալիբան»-ն ահաբեկչական կազմակերպությունների ցուցակում էր։
«Թալիբան» շարժման արգելքը կասեցնելու որոշումն ուժի մեջ է մտնում անմիջապես, փոխանցում է ՏԱՍՍ-ը Գերագույն դատարանի որոշումը։ Թալիբները կհանվեն ահաբեկչական կազմակերպությունների ցուցակից։
Վերջին մի քանի տարիների ընթացքում Ռուսաստանի իշխանությունները ակտիվորեն կապեր են պահպանել թալիբների հետ և ընդունել նրանց պատվիրակություններին Մոսկվայում՝ չնայած Ռուսաստանի տարածքում շարժման գործունեության արգելքին:
2024 թվականի մայիսին Աֆղանստանում ՌԴ նախագահի ներկայացուցիչ Զամիր Քաբուլովը հայտնել էր, որ ՌԴ ԱԳՆ-ն և Արդարադատության նախարարությունը Վլադիմիր Պուտինին առաջարկել են հանել «Թալիբան»-ին ահաբեկչական կազմակերպությունների ցուցակից։ Առանց դրա, հայտարարել է Քաբուլովը, Մոսկվան չի կարողանա թալիբներին ճանաչել որպես օրինական իշխանություն Աֆղանստանում։
Մեկնաբանելով դա՝ ՌԴ ԱԳ նախարար Սերգեյ Լավրովն ասել է, որ առաջարկը «արտացոլում է օբյեկտիվ իրականությունը»։ «Թալիբանը Աֆղանստանում իրական ուժն է, և Ռուսաստանը անտարբեր չէ դրա նկատմամբ»,- ասել է նա։
Հոկտեմբերի 4-ին Քաբուլովն ասել է, որ «Թալիբան»-ին ահաբեկչական կազմակերպությունների ցուցակից հանելու որոշումն արդեն ընդունվել է ամենաբարձր մակարդակով, սակայն «պետք է պահպանվեն իրավական ընթացակարգերը»:
Նույն օրը ՌԴ ԱԴԾ տնօրեն Ալեքսանդր Բորտնիկովը հայտնել է, որ ծառայությունն ավարտում է թալիբներին ահաբեկչական կազմակերպությունների ցուցակից հանելու աշխատանքները։
Նա նշել է, որ Աֆղանստանում իշխանության ղեկին գտնվող թալիբների գործողությունները «ուղղված են երկրում կարգուկանոնի հաստատմանը և կայունության պահպանմանը»։ Բացի այդ, Բորտնիկովն ասել է, որ թալիբներն ապացուցում են իրենց պատրաստակամությունը՝ պայքարելու ԴԱԻՇ-ի աֆղանական թևի՝ Վիլայաթ Խորասանի դեմ (երկու կազմակերպություններն էլ արգելված են Ռուսաստանում):
Սակայն միայն հայտարարությունները բավարար չէին։ Նոյեմբերի 26-ին Պետդումա է ներկայացվել օրինագիծ, որը թույլ կտա ժամանակավորապես վերացնել Ռուսաստանում ահաբեկչական ճանաչված կազմակերպությունների գործունեության արգելքը։ Փաստաթղթի բացատրական գրության մեջ ասվում է, որ Ռուսաստանի օրենսդրությունը «չի նախատեսում մեխանիզմ, որը թույլ կտա կասեցնել ահաբեկչական կազմակերպության գործունեության արգելքը»։
Դեկտեմբերի 10-ին փաստաթուղթն ընդունվել է առաջին, իսկ դեկտեմբերի 17-ին՝ երկրորդ և երրորդ ընթերցմամբ։ Իսկ դեկտեմբերի 28-ին նախագահ Պուտինը ստորագրեց այն։
Փաստաթղթի համաձայն՝ արգելքը կասեցնելու համար անհրաժեշտ է հայց ներկայացնել գլխավոր դատախազից (կամ նրա տեղակալից), որին կհետևի դատարանի որոշումը։
