ԱՄՆ-ը դանդաղեցրել է զորքերի դուրսբերման և Աֆղանստանից քաղաքացիական անձանց տարհանման տեմպը: Ինչպես հայտնում է Fox News-ը՝ վկայակոչելով Սպիտակ տունը, մեկ օր առաջ դուրս բերված քաղաքացիների թիվը գերազանցում էր հազարը:
Հեռուստաալիքի տվյալներով՝ տարհանման աշխատանքներին ներգրավված է 26 ռազմական ինքնաթիռ, որոնք Քաբուլից տարհանել են շուրջ 1200 մարդու: Եվս 50 քաղաքացի տարհանվել է կոալիցիայի չվերթներով: Ըստ ներկայացված տեղեկատվության՝ օգոստոսի 14-ից սկսած՝ ԱՄՆ-ը Աֆղանստանից տարհանել է ավելի քան 116,7 հազար մարդու:
Ըստ Պենտագոնում Fox News-ի աղբյուրների, Աֆղանստանից ամերիկյան զորքերի և դիվանագետների դուրսբերման վերջնաժամկետը նշանակված է երեքշաբթի՝ Քաբուլի ժամանակով 23:59-ին: Ամերիկյան զորքերը 20 տարվա մեջ առաջին անգամ ամբողջությամբ կհեռանան Աֆղանստանից:
