Մարտի 28-ին, Մյանմարում 7,7 և 6,4 մագնիտուդ ուժգնությամբ երկրաշարժեր են տեղի ունեցել. հայտնում է ԱՄՆ Երկրաբանական ծառայությունը (USGS): Ցնցումները զգացվել են Չինաստանում և Թաիլանդում։ Հայտնի է, որ ավելի քան 30 մարդ է զոհվել, սակայն փրկարարները ասում են, որ կարող են լինել հարյուրավոր մարդիկ:
Մյանմարի մեծությամբ երկրորդ քաղաքի՝ Մանդալայի փրկարարական խմբի ներկայացուցիչը BBC-ին ասել է, որ «վնասը հսկայական է»։
«Մահացածների թիվը նույնպես բավականին մեծ է: Այս պահին միայն դա կարող ենք ասել BBC-ին, քանի որ փրկարարական աշխատանքները շարունակվում են: Զոհերի ճշգրիտ թիվը դեռևս հայտնի չէ, բայց այն հարյուրավոր է», – ասում է փրկարարը:
Առաջին, ավելի ուժգին երկրաշարժը տեղի է ունեցել ուրբաթ կեսօրին Մյանմայի կենտրոնում՝ ժամը 12:50-ի սահմաններում. հայտնել է USGS-ը։ Երկրաշարժի օջախի խորությունը եղել է 10 կմ։
Երկրորդ երկրաշարժը հաջորդել է մոտ 12 րոպե անց։
Երկրաշարժի էպիկենտրոնը գտնվել է Սագաինգ քաղաքից 16 կմ հյուսիս-արևմուտք՝ երկրի մեծությամբ երկրորդ քաղաքի՝ Մանդալայի մոտակայքում: Նրա բնակչությունը կազմում է 1,2 միլիոն մարդ։
Տարածքը գտնվում է Մյանմարի մայրաքաղաք Նայպիդայից մոտ 100 կմ հյուսիս։ AFP-ի լրագրողները Նայփիտաուում հայտնել են, որ ցնցումների ուժգնությունը պատճառ է դարձել, որ ճանապարհները ծռվել են, իսկ գիպսի կտորները թափվել են առաստաղներից:
Ավելի ուշ լրատվամիջոցներում սկսեցին հայտնվել մահվան դեպքերի մասին հաղորդումներ։ Առնվազն 30 մարդ է մահացել Մյանմայի քաղաքներում, ըստ New York Times-ի , The Guardian-ի և Reuters-ի :
The New York Times-ը հայտնել է 20 մահվան մասին՝ վկայակոչելով Մյանմարի Մանդալայ քաղաքի հիվանդանոցի բժշկին: Նրա խոսքով՝ տուժել է առնվազն 300 մարդ։
«Զոհերի թիվն աճում է, բայց մենք չունենք բավարար բժիշկներ և բուժքույրեր»,- լրագրողներին ասել է բժիշկ Կյաու Զինը։
The Guardian-ը հայտնում է, որ ութ մարդ է զոհվել Մանդալայի Պի Գի Տագոն շրջանում գտնվող շենքում՝ վկայակոչելով ականատեսներին։
Reuters-ը, վկայակոչելով ականատեսներին, հայտնում է, որ Մյանմարի Տաունգո քաղաքում մզկիթի մասնակի փլուզման հետեւանքով երեք մարդ է զոհվել։ Բացի այդ, Աունգբան քաղաքում հյուրանոցի փլուզման հետևանքով զոհվել է ևս երկու մարդ, վիրավորվել՝ 20-ը։
