ԱՄՆ 12 նահանգների իշխանությունները դատական հայց են ներկայացրել ընդդեմ Նախագահ Ջո Բայդենի և նրա վարչակազմի՝ հանրային առողջության և շրջակա միջավայրը պաշտպանելու մասին հրամանագիր ստորագրելու համար: Ինչպես հաղորդում է Fox News-ը, հայցվորները գտնում են, որ դաշնային կարգավորիչների լիազորությունների ընդլայնումը կարող է լուրջ տնտեսական վնաս պատճառել:
Հայցում նշվում է, որ, համաձայն հրամանագրի տեքստի, դաշնային իշխանությունները կարող են հաստատել ջերմոցային գազերի սոցիալական ծախսերի թվեր, որոնք այնուհետև կդառնան դաշնային կարգավորիչների փոփոխման և նոր դրույթներ մտցնելու հիմք, ինչը կհանգեցնի լրացուցիչ ֆինանսական բեռի երկրի սովորական բնակիչների համար:
Հայտարարության մեջ Բայդենի աշխատանքային խմբի միջանկյալ գնահատականներով հանրային այդ ծախսերը կազմում են ընդհանուր առմամբ 9,5 տրիլիոն դոլար։ «Փաստորեն, այս հսկայական ցուցանիշը կօգտագործվի արդարացնելու դաշնային կարգավորիչների իշխանության հսկայական ընդլայնումը, որը կմիջամտի ամերիկացիների կյանքի բոլոր ոլորտներին՝ նրանց մեքենաներից մինչև սառնարաններ և տներ, սննդի և էլեկտրաէներգիայի վճարներ», մեջբերում է հեռուստաալիքը դատական հայցից:
