Եվրոպական դեղերի գործակալությունը մարտի 18-ին կվերանայի բրիտանա-շվեդական AstraZeneca դեղագործական ընկերության կողմից մշակված կորոնավիրուսային պատվաստանյութի վերաբերյալ ստացված բոլոր տվյալները: Այս մասին երկուշաբթի օրը հայտարարել է Առողջական սպառնալիքների և պատվաստումների ռազմավարության վարչության ղեկավար Մարկո Կավալերին:
«Մենք հասկանում ենք [ԵՄ] անդամ երկրների դիրքորոշումը: Հինգշաբթի դեղագործական ռիսկերի գնահատման հանձնաժողովը կվերանայի մեր հավաքած բոլոր տվյալները, ներառյալ Նորվեգիայի նոր տվյալները։ Դրանց հիման վրա մենք կորոշենք՝ կա՞ արդյոք մտահոգության առիթ, թե՞ կարող ենք շարունակել պատվաստել [այս պատվաստանյութով]»:
