Հինգշաբթի երեկոյան Սիրիայի վրա Իսրայելի հարձակումների վերաբերյալ Անվտանգության խորհրդի արտակարգ նիստում, ՄԱԿ-ում Իրանի դեսպան, մշտական ներկայացուցիչ Ամիր Սաիդ Իրավանին նշել է. «Այս ռազմական հարձակումները տեղի են ունենում այն ժամանակ, երբ Իսրայելի ռեժիմը շարունակում է գրավել Սիրիայի Գոլանի բարձունքները։
Տասնամյակներ շարունակ Իսրայելի ռեժիմը շարունակել է այս գրավյալ տարածքում անօրինական անեքսիայի և բնակավայրերի ընդլայնման իր քաղաքականությունը, մինչդեռ այս գործողությունները լիովին հակասում են ՄԱԿ-ի կանոնադրությանն ու Անվտանգության խորհրդի բազմաթիվ բանաձևերին»։
Իրավանին բողոքել է Իսրայելի իշխանությունների քաղաքականությունից, ասել է, որ այն դարձել է տարածաշրջանային խաղաղությանն ու անվտանգությանն ուղղված ամենալուրջ և վտանգավոր սպառնալիքը։ Սա պայմանավորված է ռեժիմի ագրեսիվ գործողությունների շարունակմամբ, ինչպես նաև Միացյալ Նահանգներից և որոշ արևմտյան երկրներից ստացվող անվերապահ քաղաքական և ռազմական աջակցությամբ։
ՄԱԿ-ում Իրանի դեսպանը նշել է. «Սիրիայի դեմ հարձակումները Անվտանգության խորհրդի լռության և միջազգային հանրության կողմից զսպող միջոցներ ձեռնարկելու անկարողության ուղղակի արդյունք են։ Իսրայելական ռեժիմը երբեք որևէ հետևանքների չի բախվել միջազգային իրավունքի կրկնվող և համակարգված խախտումների համար և շարունակում է իր ագրեսիվ գործողությունները լիակատար անպատժելիությամբ։
Այս վերջին ագրեսիան հաջորդում է Իսրայելի ռեժիմի կողմից Իրանի Իսլամական Հանրապետության դեմ 12-օրյա ռազմական գործողություններին, որոնք ՄԱԿ-ի կանոնադրության և միջազգային իրավունքի ակնհայտ խախտում են։ Իսրայելական ռեժիմը, Միացյալ Նահանգների լիակատար և անվերապահ աջակցությամբ, դիտավորյալ թիրախավորել է Իրանի Իսլամական Հանրապետության խաղաղ միջուկային օբյեկտները, որոնք գտնվում էին ՄԱԳԱՏԷ-ի վերահսկողության ներքո, ինչպես նաև քաղաքացիական ենթակառուցվածքներ, այդ թվում հիվանդանոցներ և բնակելի թաղամասեր։
Այս անօրինական հարձակումների հետևանքով զոհվել է ավելի քան 1100 խաղաղ բնակիչ, որոնց թվում՝ 41 երեխա և 126 կին։ Այս ագրեսիայի հետևանքով ամբողջությամբ ավերվել են յոթ հիվանդանոց, տասնմեկ շտապօգնության մեքենա և ավելի քան 3500 բնակելի միավոր։ Այս անհերքելի փաստերը հստակորեն բացահայտում են Իսրայելի ռեժիմի հանցավոր և ագրեսիվ բնույթը»,-հայտարարել է Իրանի ներկայացուցիչը։
Pars Today
