Ռուսաստանի Դաշնության նախագահ Վլադիմիր Պուտինը հավանություն է տվել Ուկրաինայի հետ Ազովի ծովի և Կերչի նեղուցի օգտագործման ոլորտում համագործակցության համաձայնագրի չեղարկմանը։ Փաստաթուղթը հրապարակված է իրավական տեղեկատվության պորտալում, հայտնում է kommersant.ru-ն։
ՌԴ նախագահն այս օրենքը Պետդումա է ներկայացրել մայիսի 24-ին։ Համագործակցության պայմանագիրը ստորագրվել է 2003 թվականի դեկտեմբերի 24-ին։ Փաստաթղթում պետական սահմանի վերաբերյալ կետ չկա՝ ենթադրվում էր, որ անհրաժեշտության դեպքում երկրները սահմանազատումը կֆիքսեն առանձին համաձայնագրով։
2022 թվականի սեպտեմբերի 30-ին Պուտինը համաձայնագրեր է ստորագրել ինքնահռչակ Դոնեցկի և Լուգանսկի ժողովրդական հանրապետությունների, ինչպես նաև Խերսոնի և Զապորոժիեի մարզերի՝ Ռուսաստանի Դաշնության կազմ մտնելու մասին։ Դրանից հետո Ազովի ծովը դարձել է Ռուսաստանի ներքին ծովը։
