ԱՄՆ-ը ձգտում է իրականացնել Կուբայում գունավոր հեղափոխության սցենարը: Այս մասին հայտարարել է Ռուսաստանի Դաշնության Արտաքին գործերի նախարարության պաշտոնական ներկայացուցիչ Մարիա Զախարովան, ում խոսքերը մեջբերում է Ռուսաստանի դիվանագիտական ծառայության կայքը:
«Նախ անցանկալի ռեժիմների նկատմամբ պատժամիջոցներ են կիրառվում, արհեստական խնդիրներ են ստեղծվում կամ ներդրվում դրսից, դրանք ավելի են խորացնում սոցիալ-տնտեսական իրավիճակը: Այս հիմքի վրա լարվածություն է հրահրվում, հակակառավարական տրամադրությունները բորբոքվում են: Երբ կրիտիկական զանգված է կուտակվում, դրա մեղավորը ազգային կառավարությունն է: Կախում են պիտակներ, ամեն կերպ վարկաբեկվում են նրա գործողությունները, և այդպիսով իրավիճակը հասցվում է քայքայման», նշել է Զախարովան:
«Նրանք փորձում են Կուբայի նկատմամբ կիրառել նույն ալգորիթմը: Չնայած Կուբայի կենտրոնական իշխանությունների ձեռնարկած՝ երկրի տնտեսությանը աջակցելու և բնակչությանը օժանդակություն ցուցաբերելու բոլոր միջոցառումներին, նրանք են Վաշինգտոնի կողմից մեղադրվում ներկայիս ճգնաժամային իրավիճակի մեջ: Իբր Հավանան ինքն է հրաժարվում ամերիկյան օգնությունը ընդունելուց, չի ցանկանում մասնակցել պատվաստանյութերի բաշխման միջազգային մեխանիզմներին և, ընդհանուր առմամբ, վարում է հակաժողովրդական քաղաքականություն», ասել է Զախարովան:
