Լոս Անջելեսի բնակիչները կարող են փոխհատուցում ստանալ մինչև 20 միլիարդ դոլար։ Շոու բիզնեսի շատ աստղեր կորցրել են իրենց թանկարժեք տները, հայտնում է Insurance Business-ը՝ վկայակոչելով JP Morgan-ի վերլուծաբանների գնահատականները:
Հրդեհի հետևանքով տուժել են Մել Գիբսոնը, Էնթոնի Հոփքինսը, Միլո Վենտիմիլիան, Ջոն Գուդմանը և Փերիս Հիլթոնը։
Pacific Palisades-ի բարձրակարգ թաղամասը, որն ամենաշատ տուժածն է, անցյալ տարի ապահովագրական սկանդալի թիրախում է եղել: Խոշոր State Farm ընկերությունը հրաժարվել է նոր պայմանագրեր կնքել «ոչ շահավետ պայմանների» պատճառով։
Տարածքի բնակիչների մեծ մասը ստիպված է եղել ընտրել ապահովագրության ոչ այնքան հայտնի ընկերությունների կամ պետական FAIR ծրագրեր, որոնք ցանկացած տան համար վճարումները սահմանափակում են մինչև 3 միլիոն դոլար:
Այժմ Կալիֆորնիայի ապահովագրության քարտուղար Ռիկարդո Լարան հայտարարել է, որ վերահսկողություն է սահմանում ապահովագրողների կողմից պայմանագրերը խզելու և չերկարաձգելու դեպքերով՝ «ապահովելու, որ հրդեհներից տուժած մարդիկ հնարավորինս արագ ստանան իրենց հասանելիք վճարումները»:
Այնուամենայնիվ, սա վճարումների միակ խնդիրը չէ. CNN-ը նշում է, որ որոշ բնակիչներ Արտակարգ իրավիճակների կառավարման դաշնային գործակալության (FEMA) կայքում անհատական փոխհատուցում են պահանջում, սակայն հանդիպում են «սխալների» և մերժումների:
