ԱՄՆ իշխանություններն Իսրայելին տեղեկացրել են, որ անհրաժեշտ է մինչև տարեվերջ ավարտել ռազմական գործողությունը Գազայի հատվածում, գրում է The Economist-ը՝ հղում անելով աղբյուրներին։
Հրատարակության զրուցակիցների խոսքով՝ ամերիկյան իշխանությունների դիրքորոշումը հայտնել է ԱՄՆ պետքարտուղար Էնթոնի Բլինկենը՝ վերջերս Իսրայել կատարած այցի ժամանակ։ Սակայն երկու երկրի իշխանությունները հրապարակայնորեն հերքում են, որ ԱՄՆ վարչակազմը ժամկետներ է սահմանել իսրայելցիների համար:
Այնուամենայնիվ, The Economist-ը ենթադրում է, որ Իսրայելը ընդամենը մի քանի շաբաթ ունի Գազայի հատվածում ռազմական հաջողությունների հասնելու համար: Եթե դա տեղի չունենա, ապա, ամենայն հավանականությամբ, ԱՄՆ-ը կկրճատի Իսրայելին տրամադրվող ռազմական օգնությունը, իսկ դա միայն կբարդացնի երկրի վիճակը։
The Economist-ը կարծում է, որ մինչև նոր տարի Իսրայելի հաղթանակի հավանականությունը շատ ցածր է։ Լրագրողները ենթադրում են, որ Իսրայելը կշարունակի իր ռազմական արշավը։ Ըստ ամսագրի՝ Իսրայելի պաշտպանության ուժերը, ամենայն հավանականությամբ, կշարունակեն ռազմական արշավը, թեկուզ ավելի քիչ ինտենսիվությամբ և հենվելով ցամաքային ուժերի վրա։ Նման սցենարի դեպքում, գրում է The Economist-ը, պաղեստինյան ՀԱՄԱՍ շարժումը կշարունակի վերահսկել Գազայի մի մասը։
Բացի այդ, ԱՄՆ իշխանությունները պահանջում են Իսրայելից ավելի շատ ջանքեր գործադրել՝ «թեթևացնելու պաղեստինցի խաղաղ բնակիչների տառապանքը», հատկապես Գազայի հատվածի հարավում, ավելացնում է հրատարակությունը։
Իսրայելի և ՀԱՄԱՍ-ի միջև պատերազմը սկսվել է հոկտեմբերի 7-ին։ Իսրայելի իշխանությունները զոհերի թիվը գնահատել են 1,4 հազար, պաղեստինյան իշխանությունները հայտնել են ավելի քան 17 հազար զոհերի մասին։ Նոյեմբերի վերջին կողմերը պայմանավորվել են մի քանի օրով զինադադարի մասին, սակայն դեկտեմբերի 1-ին իսրայելական բանակը վերսկսել է գործողությունները Գազայում։
